პრემიერ-მინისტრის ირაკლი ღარიბაშვილის განცხადებით, საქართველოში თურქეთში წარმოებული წამლები უკვე იყიდება.
როგორც დღეს, 7 მარტს, გამართულ მთავრობის სხდომაზე ღარიბაშვილმა თქვა, თურქეთიდან წამლების შემოტანამ მედიკამენტებზე ფასი ზოგიერთ შემთხვევაში 80%-მდეც კი შეამცირა.
“მოგეხსენებათ წამლების გაიაფების პროცესი დავიწყეთ და თურქეთის ბაზარი გავხსენით იმ დათქმით, რომ მხოლოდ GMP-ის სტანდარტის მაღალი ხარისხის წამლები შემოვიდოდა. მოსახლეობას მინდა ვუთხრა, რომ წამლები საქართველოში უკვე შემოსულია და აფთიქებში იყიდება.
ასევე მინდა მოქალაქეებს რამდენიმე მაგალითი მოვუყვანო: დღეს ყველაზე მოთხოვნადი წამლები რაც არის, მაგალითად, გულ-სისძარღვთა დაავადების სამკურნალო მედიკამენტის ფასი მანამდე თუ 220 ლარი ღირდა, დღეს მისი ღირებულება 48 ლარია.
უმეტეს შემთხვევაში, 60-80%-ით არის შემცირებული ფასი მედიკამენტებზე და როგორც მინიმუმ განახევრებულია ფასები. ამას გარდა, ათეულობით სხვადასხვა დასახელების მედიკამენტია სამინისტროში რეგისტრაციისთვის შეტანილი და დაჩქარდება ეს პროცესი, რათა დროულად მოხდეს ყველა წამლის ჩანაცვლება”,-აცხადებს ღარიბაშვილი.
ირაკლი ღარიბაშვილის თქმითვე, საქართველოში წამლის ხარისხის გაკონტროლების მიზნით ლაბორატორიის შექმნა იგეგმება, რათა ქვეყანაში წარმოებული, თუ იმპორტირებული მედიკამენტების ხარიხსი შემოწმდეს.
