გრძელდება ქართველი ხალხის შანტაჟი ვიზალიბერალიზაციის თემით, – ამის შესახებ საქართველოს პრემიერ-მინისტრმა, ირაკლი კობახიძემ პარლამენტში ყოველწლიური ანგარიშის წარდგენისას განაცხადა.
მისივე თქმით, „აბსოლუტურად უსამართლოა ის დამოკიდებულება, რომელსაც ევროპული ბიუროკრატია ქართველი ხალხის მიმართ ავლენს“.
„ჩვენ ძალიან რთული პროცესები გამოვიარეთ ამ წლების განმავლობაში. ძალიან დიდი უსამართლობა იყო ქართველი ხალხის მიმართ და ყველგან ორმაგ სტანდარტს ვხედავდით. ძალიან კარგად ხედავთ, რომ აბსოლუტურად უსამართლოა ის დამოკიდებულება, რომელსაც ევროპული ბიუროკრატია ქართველი ხალხის მიმართ ავლენს. რა ახსნა აქვს იმას, რომ 2022 წლის ივნისში უკრაინას და მოლდოვას მისცეს კანდიდატის სტატუსი და არ მისცეს საქართველოს, შესაბამისად, ქართველ ხალხს. ამას ერთადერთი ახსნა აქვს, ეს არის უსამართლობა და ორმაგი სტანდარტი. ეს გააკეთეს 2022 წლის ივნისში და 2023 წლის დასაწყისში თვითონვე აღიარეს, რომ საქართველოს მეტად ეკუთვნოდა ეს სტატუსი, ვიდრე სხვა კანდიდატ ქვეყანას, მაგრამ ეს იყო უსამართლობა. ეს უსამართლობა ივნისიდან წელიწად ნახევარი გაგრძელდა. ხედავდით, რომ პარალელურად, როდესაც ისინი უარს გვეუბნებოდნენ ხან კანდიდატის სტატუსზე, ხან მოლაპარაკებების გახსნაზე, ამის პარალელურად, მათი დაფინანსებული NGO-ები ცდილობდნენ საქართველოში რევოლუციის მოწყობას. ამის წინააღმდეგ ჩვენ მოგვიწია „გამჭვირვალობისა“ და „გრანტების კანონის“ მიღება. გახსოვთ, ამაზე რა რეაქცია ჰქონდათ და რამხელა სიცრუე გაავრცელეს. „შავი დღე ქართული დემოკრატიისთვის“-ეს არის მაშინდელი ყოფილი ადმინისტრაციის დროინდელი აშშ-ის ელჩის სიტყვები. სირცხვილი, სირცხვილი და თავის მოჭრა. ასეთ პირობებში, ჩვენ გვიწევდა დაპირისპირება უსამართლობასთან, ორმაგ სტანდარტებთან. როდესაც გრძელდება ქართველი ხალხის შანტაჟი ვიზალიბერალიზაციის თემით, ესეც ამ შანტაჟის გაგრძელებაა. ძალიან სამწუხარო მოვლენაა, თუმცა ჩვენ მოთმინებით ვუყურებთ ყველაფერს. ჩვენ თანმიმდევრულად ვასრულებთ ევროინტეგრაციასთან დაკავშირებულ ვალდებულებს. შესრულებული გვაქვს ვალდებულებების 80%,მათ შორის უშუალოდ ასოცირების შეთანხმებიდან გამომდინარე ვალდებულებების 81%. ეს არის ჩვენი მიდგომა და დამოკიდებულება. როგორი უსამართლოც არ უნდა აიყოს ევროპული ბიუროკრატიის დამოკიდებულება ქართველი ხალხის მიმართ, ჩვენ ჩვენი გზა გვაქვს არჩეული და ამ გზას ბოლომდე მივყვებით“,-განაცხადა კობახიძემ.
