12 წლის წინ გაუჩინარებულ ბიჭის, გურამ დადიანიძის დედა, სოფიო ბიბილაშვილი “TV პირველთან” საუბრობს გავრცელებულ ვიდეოზე, სადაც მკვეთრად ისმის სავარაუდოდ დაკარგული გურამ (გურიკა) დადიანიძის განწირული ხმა: „წამოდი, ბიჭო“, „კახა“, „არ მიმატოვო, გეხვეწები“.
გურამ დადიანიძის დედა აცხადებს, რომ აღნიშნული ჩანაწერის ნახვა მისთვის უმძიმესი აღმოჩნდა.
მისი თქმით, თუ ვინმემ რაიმე ინფორმაცია იცის მისი შვილის შესახებ და დღემდე არ ამხელს, მისთვის გაუგებარია, როგორ შეუძლია ამ ტვირთით ცხოვრება.
“ამ ვიდეოს ნახვა ჩემთვის იყო სიკვდილი. თუ რომელიმე მათგანი მიცქერის და უმნიშვნელო რამეც კი იცის ჩემი შვილის შესახებ და არ მეუბნება, არ ვიცი, როგორ ცხოვრობს“, – ამბობს ის.
მისი თქმით, ვიდეოში ისმის ისეთი ინტონაცია, რომელიც მას იმ შემთხვევებს ახსენებს, როდესაც გურამს ცუდად გახდომისას ჰქონდა.
“ამ მომენტში გურის აქვს ცუდად გახდომის ხმა – უკვე რომ ეტირება, აღარ ხუმრობს. გურის ჩემი ხმა აქვს, იგივე მეორდება ამ ვიდეოში. რამდენჯერმე ჰქონია ასეთი მომენტი, როცა უნდა ეტირა ხოლმე და ზუსტად ეს ხმა გამახსენდა. 12 წლის შემდეგ პირველად მოვისმინე და ვნახე ეს ვიდეო“, – აცხადებს ის.
სოფიო ბიბილაშვილი ვარაუდობს, რომ ვიდეოში ძალადობა არ ჩანს, რადგან ასეთ შემთხვევაში, მისი თქმით, გარშემომყოფები აუცილებლად მიაქცევდნენ ყურადღებას.
“რატომ დატოვეს? ისეთი ხმა აქვს, თითქოს ეხვეწება, ცუდად არის. ცემა მანდ არ არის, თორემ ხალხი მიაქცევდა ყურადღებას. თავად გურიკა ცუდად არის, ეტყობა, ვეღარ მიდის და ეხვეწება, არ მიატოვონ, რომ იქ არ დარჩეს. თავისთავად მოწმეები იტყუებიან – გამოდის, რომ დაბლა იქეიფეს და გამთენიისას წავიდნენ მაღლა“, – ამბობს ის.
ცნობისთვის, უკვე რამდენიმე კვირაა საზოგადოება დიდი ყურადღებით ადევნებს თვალს ამბავს, რომელიც 12 წლის წინ გაუჩინარებულ ბიჭს ეხება. 17 წლის გურამ დადიანიძე 2014 წელს გაუჩინარდა და მას შემდეგ მოზარდის კვალს ვერ მიაგნეს. ის, დუშეთის რაიონის სოფელ ქვემო მლეთაში, ლომისობის დღესასწაულზე ექსკურსიაზე იმყოფებოდა. გაუჩინარებული ბიჭის დედა, სოფო ბიბილაშვილი შვილის პოვნაში დახმარებას დღემდე ითხოვს.
გურამი მლეთაში მეგობარი ახალგაზრდების ჯგუფს გაჰყვა. ყველა მათგანი, თბილისში ისე დაბრუნდა, რომ არც ერთ მათგანს არ აქვს პასუხი, სად გაქრა მათი მეგობარი გურამი და რატომ არ დაბრუნდა მათთან ერთად.
გუშინ სოციალურ ქსელში ვიდეო გავრცელდა წარწერით: “მეგობრებო, სოციალურ ქსელებში ვირუსულად ვრცელდება სავარაუდოდ ლომისაზე გადაღებული ვიდეო, სადაც მკვეთრად ისმის სავარაუდოდ დაკარგული გურამ (გურიკა) დადიანიძის განწირული ხმა: „წამოდი, ბიჭო“, „კახა“, „არ მიმატოვო, გეხვეწები“. ვიდეოს ავთენტურობის დასადგენად ვიდეო გადაგზავნილია ექსპერტიზაზე.”
დადიანიძის ოჯახის ადვოკატი ტარიელ კაკაბაძე ამ თემას ეხმაურება და ამბობს, რომ დედამ ვიდეოში შვილის ხმა ამოიცნო.
“ბოლო წამებზე ნამდვილად ისმის განწირული ხმა: “კახა, არ მიმატოვო, გეხვეწები”. გურამის დედა კატეგორიულად ადასტურებს, რომ ეს არის მისი შვილის ხმა. ეს ვიდეო 12 წლის წინ დაიდო იუთუბზე” – წერს კაკაბაძე.
