სამსახურში რომ მოვდიოდი ყოველ დილით 5, 6, 7 მანქანის ნომრებს ვამოწმებინებდი, ყველას საშვი ჰქონდა. დისტრიბუცია, სამედიცინო მომსახურეობა, სააფთიაქო ქსელები, ჟურნალისტები, – ამის შესახებ ჟურნალისტებს პრემიერ-მინისტრმა გიორგი გახარიამ განუცხადა.
მისივე თქმით, როცა არის მსუბუქი ავტომობილებით გადაადგილების შეზღუდვა, დილით იღვიძებ და ქალაქში ამდენი მანქანა მოძრაობას, რა თქმა უნდა, მიგაჩნია, რომ ეს არასამართლიანია.
„მესმის, მეც ასე მიმაჩნია, მაგრამ სამწუხაროდ, საგანგებო მდგომარეობაში ვიმყოფებით და კონტროლის ინსტრუმენტები არ არის ისეთი ეფექტური, როგორც თითოეულ ჩვენგანს ჰგონია. მეორეს მხრივ არის უამრავი დაწესებულება და სერვისი, რომლის გაჩერებაც უბრალოდ არ შეიძლება. სასურსათო მაღაზიების გამყიდველებისგან დაწყებული საფთიაქო ქსელების მენეჯმენტით დამთავრებული. გუშინ დაემატა საინკასაციო ასობით მანქანა იმისთვის, რომ პენსიები დარიგდეს,” – განაცხადა გახარიამ.
რაც შეეხება აღდგომის ღამეს სასულიერო პირებისთვის გადაადგილების ნებართვას, გახარიას თქმით, აღდგომის ღამეს მისთვისაც წარმოუდგენელი და შეუძლებელი იყო საეკლესიო მსახურებისთვის არ მიეცა საშუალება, რომ ეკლესიამდე მისულიყვნენ.
„ეს არის იმ კომპრომისები და ბალანსი, რომლის საშუალებითაც ვეძებთ გზას, გავუმკლავდეთ ამ ეპიდემიას და პანდემიას. ეს ჩვენი გზაა. სხვა ქვეყნებს თავისი გზა აქვთ. ჩვენს შემთხვევაში არის ისე, რომ სააღდგომო მსახურება ეკლესიაში მამაოების თანხლებით მაინც უნდა ჩატარდეს. ის სურათი, რაც სააღდგომო დღესასწაულების შემდეგ თბილისში იყო, მეც არ მომეწონა. მეც უკიდურესად გაღიზიანებული ვიყავი და მეც მქონდა უდიდესი უსამართლობის გრძნობა. პირადად მე, სამსახურში რომ მოვდიოდი ყოველ დილით 5,6,7 მანქანის ნომრებს ვამოწმებინებდი, ყველას საშვი ჰქონდა. დისტრიბუცია, სამედიცინო მომსახურეობა, სააფთიაქო ქსელები, ჟურნალისტები. ყველაზე დიდი რაოდენობა საშვების გაქვთ მედიას. ათასობით. ზოგიერთმა უპასუხისმგებლო ვითომ მედიამ და სინამდვილეში პოლიტიკოსმა ეს გამოიყენა ლაივების დასადებად. მესმის, რომ იდეალურია არაფერი არაა, აქ შეცდომები იყო. შეუძლებელია 2-3 დღეში ეფექტურად მომუშავე ინსტრუმენტის გაკეთება. ამიტომ აქ ცოტა ერთმანეთს უნდა დავუთმოთ,” – განაცხადა პრემიერ-მინისტრმა.