დაავადებათა კონტროლის ეროვნული ცენტრის დირექტორის ამირან გამყრელიძის განცხადებით, თბილისში, რუსთავში, ქუთაისსა და ბათუმში დიდი ამცრელი ცენტრების მოწყობა იგეგმება, სადაც დღეში 1000-დან 2000-მდე ადამიანის აცრა იქნება შესაძლებელი.
როგორც გამყრელიძემ მედია-ვებინარზე განაცხადა, ამ ცენტრების მუშაობაში, შესაძლოა, სამედიცინო განათლების მქონე დაუსაქმებელი ადამიანების ჩართვა მოხდეს.
„ამ ეტაპზე ვაქცინაციისთვის 150 ბრიგადა მუშაობს ქვეყნის მასშტაბით. მაისის ბოლოსთვის გვინდა 300 ბრიგადაზე ავიდეთ. ჯერჯერობით პროცესში არ არიან ჩართულები სოფლის ექიმები. ასევე გეგმაში გავქვს ე.წ. დიდი ამცრელი ცენტრების მოწყობა 4 დიდ ქალაქში. დღეს იქნება განხილვა მისი მუშაობის ლოჯისტიკის სქემის. ერთ ასეთ ცენტრში დღეში დაახლოებით 1000-დან 2000-მდე ადამიანის აცრა იქნება შესაძლებელი. ასეთი ცენტრი თბილისში გვინდა რომ იყოს სამი, ბათუმში, ქუთაისში და რუსთავში – თითო. მათ მომსახურე პერსონალი სჭირდებათ და ამიტომ დგას საკითხი, რომ ე.წ. დამატებითი დაუსაქმებელი სამედიცინო განათლების პერსონალი მობილიზდეს ამ პროცესში“,- განაცხადა ამირან გამყრელიძემ.
