გარდაიცვალა ღირსეული ადამიანი, კუკური ჩოგოვაძე

კუკური გიორგის ძე ჩოგოვაძე 1932 წლის 18 ივლისს დაიბადა, მისი ცხოვრება მრავალფეროვანი პროფესიით გამოირჩეოდა, ახალგაზრდობაში ცნობილი ალპინისტი იყო.

მთამსვლელობით მაშინ დაინტერესდა , როდესაც ლევან ახვლედიანი გაიცნო . ლევანი მთიდან ახალი დაბრუნებული იყო და ყველანი ულოცავდნენ შინ მშვიდობით დაბრუნებას. კუკური ამის შესახებ ლევან ახვლედიანის ხსოვნისადმი მიძღვნილ წიგნში ” დაუმთავრებელი მემუარები” მოგონების სათაური “საიმედო ლიდერი” წერდა : ” მე მაშინ მთამსვლელობის არაფერი გამეგებოდა, მაგრამ მაინც საინტერესო საქმედ მომეჩვენა . საოცრად მომინდა დამეძლია ბევრი დაბრკოლება , დამელაშქრა მაღალი მწვერვალები…”

ეს სურვილი კი რეალობად აქცია და ლევან ახვლედიანთან ერთად დალაშქრა პამირისა და ტიანშანის მაღალი მწვერვალები. ამის გარდა ხერგიანებთან ერთად არაერთხელ დაულაშქრავს , როგორც საქართველოს მთები ასევე მის ფარგლებ გარეთ მწვერვალები.

1956 წელს გამოცდის წარმატებით ჩაბარების შემდეგ გეზი მწვერვალ დოლამისისკენ აიღო და წინ მიუძღოდა ახალგაზრდა ალპინისტთა ერთ-ერთ ოცრულს.

საკვირველი ის არის , რომ ერთ-ერთი ლაშქრობიდან დაბრუნებულმა ჩამოტანილი “ედელვაისების კონა” აჩუქა “ჭადრაკის დედოფალს” ნონა გაფრინდაშვილს , რომელიც იმ წელს პირველად გახდა მსოფილიოს ჩემპიონი, რითაც მეტისმეტად გააოცა ის. ნონას აღტაცებით უთქვამს” ეს არის ყველაზე ძვირფასი საჩუქარი”ო .

იყო არაჩვეულებრივი პიროვნება , შეუდარებელი თამადა, სუფრას სულ ლექსებით უძღვებოდა , მიუხედავად უამრავი ფათერაკისა და ავადმყოფობისა მაინც მხნედ იყო. მუდამ ხალისიანი და კარგი მოსაუბრე, უზადოდ პოზიტიური პიროვნება.

ჩოგოვაძეების გვარის შეუდარებელი წარმომადგენელი, დაჯილდოვებულია სიგელებითა და მედლებით. ერთ-ერთი სიგელი “საგვარეულოს წინაშე გაწეული ღვაწლისათვის” გადაეცა მას, შეყვანილია საგვარეულოს მატიანეში.

ამასთან ერთად დაჯილდოვებულია ქუთაისის სამკერვალო კომპანია “იმერის” “საპატიო სიგელით” კომპანიაში გაწეული ხანგრძლივი, ნაყოფიერი და უანგარო შრომისათვის , სადაც 1953 წლიდან 2019 წლამდე მუშაობდა.