საჩხერეში არასრულწლოვნის მიმართ გარყვნილი ქმედების გამო დაკავებულ პირს ბრალი ოფიციალურად წარედგინა. ბიზნესმენ ბესიკ ივანაშვილს ბრალი 141-ე მუხლის, მე-2 ნაწილით ედება, რაც წინასწარი შეცნობით, თოთხმეტი წლის ასაკს მიუღწეველთან ჩადენილი გარყვნილ ქმედებას გულისხმობს.
ადვოკატი ავთანდილ ბუცხრიკიძე აცხადებს, რომ დაკავებული ბრალს არ აღიარებს და ვარაუდობს, რომ მისი დაკავება ბიზნესსაქმიანობას უკავშირდება.
ადვოკატის თქმით, საქმის მასალები დღეს გადაეცა და სრულად არ გაცნობია.
რაც შეეხება აღკვეთის ღონისძიებას, საქმეზე სასამართლო ხვალ გაიმართება. სხდომა დახურული იქნება და ონლაინრეჟიმში ჩატარდება.
ჭორვილელი ახალგაზრდა ბიზნესმენი “ქართული ოცნების” თავმჯდომარის მეზობელია და მის ოჯახთან დაახლოებულ პირად მიიჩნევა. ის ბოლო წლების განმავლობაში სისტემატურად იგებდა ტენდერებს იმერეთის რეგიონში და მასზე ოპოზიცია ხშირად საუბროდა, რომ შესყიდვები სწორედ მის კომპანიაზე იყო მორგებული.
ერთ-ერთი ბოლო ტენდერი, რომელშიც ივანაშვილი მონაწილეობდა, ქუთაისში ასსაფეხურიანი კიბის მოწყობა იყო.
ერთიანი ნაციონალური მოძრაობის ფრაქციის თავმჯდომარის გიგა შუშანიას თქმით ბიზნესმენი სარგებლობდა ივანიშვილის დის, მაგული ივანიშვილის მფარველობით და კონკურენციის გარეშე იგებდა ტენდერებს იმერეთში. ქუთაისში ას საფეხურიანი კიბის ტენდერში ყველა დოკუმენტი დარღვევით ქონდა წარმოდგენილი, მაგრამ ვერ გაუბედეს უარი და მხოლოდ ჩემი ბრიფინგის მერე ჩამოშორდა ამ ტენდერს. 2012 წლამდე სოციალურად დაუცველი იყო და მხოლოდ ივანიშვილის ხელისუფლებაში მოსვლის მერე აღმოაჩნდა მშენებლობის ნიჭი.” – ამბობს გიგა შუშანია.
