ყოფილი მხატვრის სახლის შენობაში გაუსაძლისი პირობებია. აქ შესახლებულ 10 ოჯახს, მცირეწლოვან ბავშვებთან ერთად საპირფარეშოსა და ელემენტარული პირობების გარეშე უწევთ ცხოვრება. არ აქვთ წყალი და შუქი რამდენიმე კვირაა რაც მათ საცხოვრებელში აინთო. ოჯახები მეზობლების იმედად ცხოვრობენ და მათ ერთადერთ შემოსავალს სოციალური დახმარება წარმოადგენს. როგორც ადგილობრივები ამბობენ ისინი ვერც საახალწლო ნობათის მიღებას ახერხებენ და მათი პრობლემებით იშვიათად თუ ინტერესდება ვინმე.
ყოფილი მხატვრის სახლში მცხოვრები ადამიანებების პრობლემებზე ისაუბრა პარტია ,,თავისუფალი საქართველოს“ იმერეთის ბიუროს ხელმძღვანელმა გოგი წულაიამ და შენობასთან გამართულ ბრიფინგზე ადგილობრივი ხელისუფლების პრემია-დანამატების ამსახველი საბუთი წარმოადგინა:
,,როდესაც მერია დანამატს იღებს სამასი ათას ლარს და ასეთ პირობებში აცხოვრებენ ბავშვებს ეს არის დანაშაული უფლის წინაშე და ეს არის უზნეობა. რამდენიმე წლიანი ბრძოლის შემდეგ დენი შეუყვანეს, აქ არ არის წყალი, ტუალეტი, შენობა არის ამორტიზებული და არავინ მერიიდან მათ ამბავს არ კითხულობს. ეს არის თავხედობა და ღალატი ქვეყნისა და ხალხის წინაშე.“ – განაცხადა გოგი წულაიამ. მხატვრის სახლში 10 ოჯახი მცირე წლოვან ბავშვებთან ერთად უკვე 8 წელია ცხოვრობს.
