ეს არის აქტი, რომელიც პირველია თავის ბუნებით და მხოლოდ საქართველოს შეეხება, – ამის შესახებ პრემიერ- მინისტრის მრჩეველმა ირაკლი ჩიქოვანმა აშშ-ს წარმომადგენელთა პალატის მიერ საქართველოს მხარდამჭერ ორპარტიულ აქტთან დაკავშირებით მთავრობის ადმინისტრაციაში გამართულ ბრიფინგზე განაცხადა.
ირაკლი ჩიქოვანის თქმით, გაგრძელდება მუშაობა სტრატეგიულ პარტნიორთან, რომ ეს აქტი მიღებულ იქნას სენატში. მისი თქმით, მნიშვნელოვანია ის ფაქტი, რომ აქტს მოწინააღმდეგე არ ჰყავს.
“ეს არის ძალიან მნიშვნელოვანი აქტი, რომელიც კიდევ უფრო მეტად ამყარებს საქართველოსა და ამერიკის შეერთებული შტატების თანამშრომლობას თავდაცვის, უსაფრთხოების, ეკონომიკის და კიბერუსაფრთხოების დარგში. ეს არის აქტი, რომელიც პირველია თავის ბუნებით და მხოლოდ საქართველოს შეეხება და ეს არის ძალიან მნიშვნელოვანი.
საქართველოს ხელისუფლება დიდი ხანია მუშაობს თავის სტრატეგიულ პარტნიორთან – აშშ-სთან, რომ ეს აქტი იქნეს მიღებული. საქართველოს პრემიერ- მინისტრი გიორგი გახარია მადლობას უხდის აშშ-ს წარმომადგენელთა პალატას ამ გადაწყვეტილების გამო. ჩვენ ვხედავთ ყველა შესაძლებლობას იმისათვის, რომ ჩვენი ურთიერთობები კიდევ უფრო გაღრმავდეს. ეს აქტი პირდაპირ მიუთითებს, რომ საქართველოსა და აშშ-ს ურთიერთობები დღეს არის უმაღლეს დონეზე. აქტში პირდაპირ მითითებულია, რომ ოკუპაცია, რომელიც საქართველოს ტერიტორიაზე მიმდინარეობს, არის უკანონო და ყველამ უნდა შეასრულოს ის გადაწყვეტილება, რომელიც თავის დროზე იქნა მიღწეული მშვიდობის აღდგენასთან დაკავშირებით. ასევე, მნიშვნელოვანია, რომ ამ აქტით ყველა ის ადამიანი, რომელიც მონაწილეობს ადამიანის უფლებების დარღვევაში ოკუპირებულ ტერიტორიებზე, მოხვდება სანქციების ქვეშ. რაც მთავარია, ასევე არის მნიშვნელოვანი მიმართვა ამერიკის სავაჭრო წარმომადგენელთან, რომ მან დააჩქაროს მოლაპარაკებები საქართველოსთან თავისუფალი ვაჭრობის შესახებ. ხაზგასმით არის ასევე აღნიშნული, რომ ეს მოლაპარაკებები არის მნიშვნელოვანი წინგადადგმული ნაბიჯი და საშუალებას მისცემს როგორც საქართველოს ეკონომიკას განვითარდეს, ასევე ამერიკულ კომოპანიებს ჰქონდეს წვდომა კიდევ უფრო დიდ ბაზრებთან,”- განაცხადა ირაკლი ჩიქოვანმა.
შეგახსენებთ, რომ აშშ-ის წარმომადგენელთა პალატამ ერთსულოვნად დაამტკიცა ორპარტიული „საქართველოს მხარდამჭერი აქტი“, რაც საქართველოსა და აშშ-ს შორის სტრატეგიული ურთიერთობების თვისებრივად კიდევ უფრო მაღალ დონეზე აყვანის მკაფიო დასტურია. ამის შესახებ ინფორმაციას საგარეო საქმეთა სამინისტრო ავრცელებს. მათი ცნობით, ორპარტიული კანონპროექტი კიდევ ერთხელ ხაზს უსვამს საქართველოს სუვერენიტეტის, დამოუკიდებლობისა და ტერიტორიული მთლიანობისადმი აშშ-ის მტკიცე მხარდაჭერას და საქართველოს ოკუპირებულ ტერიტორიებზე ადამიანის უფლებათა დამრღვევი პირების წინააღმდეგ სანქციების დაწესების ინიციატივით გამოდის.
