ხონი სამტრედიის ეპარქიის ეპისკოპოსმა, მიტროპოლიტმა მეუფე საბა საკვირაო ქადაგებაში სხვა საკითხებთან ერთად, ეკლესიის მიმართ არსებულ გამოწვევებზე და პრეზიდენტის განცხადების შესახებ ისაუბრა. გთავაზობთ ამონარიდს ქადაგებიდან.
,,სახარება გვასწავლის, რომ ყოველი ხელმწიფება არის ღვთისაგან და თითოეულ ჩვენთაგანს მართებს მორჩილება, მაგრამ იმ დრომდე, იმ მომენტამდე, ვიდრე ხელისუფლის საქციელი, მისი დამოკიდებულება, გამონათქვამი არ ეწინააღმდეგება ეკლესიურ სწავლებას და არ შეურაცხყოფს ეკლესიას, მის იერარქებს და ზოგადად, ქრისტიანულ სამყაროს.
ვფიქრობ, რომ ის, რაც გაჟღერდა ამ დღეებში, ამ ყველაფრის, ამ ჩამონათვალის დარღვევაა, ამიტომ თავს უფლებას ვაძლევ ჩემი მოკრძალებული აზრი გამოვხატო და შევეწინააღმდეგო ყოველგვარ გამოვლინებას ეკლესიის წინააღმდეგ, განსაკუთრებით იმ პატრიარქის წინააღმდეგ, რომელიც 46 წელი ბრძნულად მართავს ჩვენს ეკლესიას და არა მარტო ეკლესიას, ის ეხმარება ქვეყანას და ქართველ ხალხს, ვიაროთ ბეწვის ხიდზე და ამ ურთულეს დროს, არ მივიღოთ ის მავნე და მახინჯი ცხოვრების წესი, რომელსაც ჩვენ გვიჩიჩინებენ სხვადასხვა უცხო ქვეყნებიდან და რომელსაც ემსახურებიან სამწუხაროდ, არ მინდოდა ასეთი კატეგორიული ვყოფილიყავი, მაგრამ სამწუხაროდ, ემსახურება ჩვენი პრეზიდენტიც და მისი გარემოცვა და ის არასამთავრობო ორგანიზაციები, თუ ეკლესიის მოწინააღმდეგე ადამიანები და ხშირ შემთხვევაში ოპოზიციაში მყოფი ადამიანებიც, რომლებიც ალბათ ფულზე, თუ სხვა რამეზე იყიდებიან და არაფრად დაგიდებენ ეკლესიის ლანძღვას გინებას, შევიწროებას. მის სურვილებს განადგურებისა, გაუქმებისა და ახლის შექმნისა და ა. შ.
თამამად შეიძლება ისაუბრო და თქვა, რომ ასეთ ადამიანებს არც წარსული აინტერესებს ეკლესიისა, არც დღევანდელობა და არც მომავალი. მათ უნდათ , რომ ყველა ინსტიტუცია და მათ შორის, ეკლესია, რომელიც ერთ-ერთი ძლიერი ინსტიტუციაა საქართველოში და რომელსაც მხარს უჭერს მოსახლეობის უმრავლესობა, მიუხედავად იმისა, რომ ბევრი მათგანი საეკლესიო წესებით არ ცხოვრობს, მაგრამ მაინც მხარს უჭერს და თვლიან, რომ ის არის ერთადერთი ინსტიტუცია -ეკლესია პატრიარქი და ღვთისმსახურები, როგორი დარღვევებიც არ უნდა იყოს ეკლესიის წიაღში, ის არ არის ისეთი, რომელიც მას ხელს უშლის ამ მოვალეობის შესრულებაში და ხალხი თვლის, რომ ეს ინსტიტუცია არის განმსაზღვრელი, ჩვენი ქვეყნის წარსულისაც, დღევანდელობისაც და მომავლისაც და ყველა ის ადამიანი, რომელიც ამ ინსტიტუციას გაუცნობიერებლად, თავისი იდიოტური შეფასებებით ხელს შეუშლის ის არის მტერი ამ ეკლესიისა, მიუხედავად იმისა, რომ ხშირ შემთხვევაში, როცა გაუჭირდებათ, მოცუნცულდებიან პატრიარქთან, მიუხედავად იმისა, რომ ის არის მოხუცი, ხანდაზმული და როგორც ახლა ბრძანებს ქალბატონი პრეზიდენტი, რომ არის უძლური მართოს ეკლესია დღევანდელი თანამედროვე წესებით და თითქოს ჩარჩენილია ძველ დროში, მოცუნცულდებიან და ხშირად ყურში ჩასჩურჩულებენ პატრიარქს, რომ ისინი მისი ერთგულები არიან, ძალიან უყვართ, პატივს სცემენ, იზიარებენ მის გამონათქვამებს, აღიარებენ მის პიროვნებას და ასე შემდეგ. მაგრამ როდესაც წარდგებიან იქ, საიდანაც იმართებიან, ეკლესიას მშვენივრად ლანძღავენ და თვლიან რომ პატრიარქი უკვე მოხუცდა და უნდა შეიცვალოს, უნდა მოვიდეს პრო ევროპულად მოაზროვნე პატრიარქი და ეკლესიაში უნდა იყოს პრო ევროპულად მოაზროვნე სამღვდელო პირები. მე მინდა გითხრათ, რომ საქართველოს ეკლესიაში არასდროს არ ყოფილა და არც არასდროს არ იქნება არც პრო ევროპულად, არც პრო რუსულად, არც პროამერიკულად და არანაირ ,,პროდ” მოაზროვნე პატრიარქი, ეკლესიის მმართველი ორგანო და ეკლესიის შემადგენლობა. საქართველოს ეკლესიაში ყოველთვის აზროვნებდნენ ქრისტიანულად, ქრისტეს მოძღვრებით, იმ წესებით და იმ კანონებით, რომელიც თვით, უფალმა იესო ქრისტემ დაადგინა ამ ეკლესიაში და გეტყვით, რომ საქართველოს ეკლესია არის ერთადერთი ეკლესია მთელ მსოფლიოში, ევროპაში და სხვაგანაც, რომელსაც არასდროს არ გადაუხვევია ქრისტეს სწავლებისთვის და არასდროს არ გადაუხვევს, როგორი პრეზიდენტიც არ უნდა გვყავდეს, როგორი არასამთავრობო ორგანიზაციები არ უნდა გვყავდეს, როგორი ხელისუფალი არ უნდა მოვიდეს, როგორი ოპოზიციაც არ უნდა გვყავდეს. როგორ უნდა შეცვალონ ადამიანის ბუნება და იმაზე მეტი რა უნდა შეცვალონ, რაც კომუნისტებმა გააკეთეს. ამაზე უარესს ვერაფერს იზამთ და ნუ იქნებით
იდეოლოგიურად კომუნისტებზე უარესი ადამიანები, მიუხედავად ამისა საქართველოში ქართველი ადამიანის ბუნებას ვერ შეცვლიან და მას ვერ გადაახვევინებენ იმ რწმენისაგან, იმ სწავლებებისაგან, რომელიც იესო ქრისტემ დაადგინა და ეს არის ის სწავლება, რომელიც არ მოძველდება, რომელიც ყოველდღიურად ეხმიანება და იზიარებს იმ თანამედროვეობასაც კი, რომელშიც ჩვენ გვიწევს ცხოვრება . ეს არის ის სიბრძნე, რომელიც არის ამოუწურავი და რომელსაც ადამიანის გონება, როგორი განათლებაც არ უნდა მიიღოთ თქვენ, ვერასდროს ვერ მიწვდება არათუ, თქვენ წმინდა მამებიც კი , ამ ამოუწურავ სიბრძნეს ბოლომდე ვერ ჩაწვდნენ, იმიტომ რომ ეს არის თვით ღმერთის მიერ დადგენილი და ადამიანს აქვს შესაძლებლობა ამ ამოუწურავ სიბრძნეზე უსასრულოდ იფიქროს და უსასრულოდ განვითარდეს, არა მხოლოდ ამ ქვეყნად ამქვეყნიური ცხოვრების დასრულების შემდგომ.
