მგონია, რომ პიკი იქნება სადღაც ორ კვირაში, აპრილის ბოლოს მაისის დასაწყისში, – ამის შესახებ ინფექციური საავადმყოფოს დირექტორმა თენგიზ ცერცვაძემ განაცხადა.
როგორც მან ჟურნალისტებს განუცხადა, იმ პირობით, თუ მოქალაქეები შეძლებენ დაიცვან რეკომენდაციები, შეზღუდვები და უსაფრთხოების ზომები, თუნდაც იმ დონეზე როგორ დღეს იცავენ, ეს პიკი იქნება 2 კვირაში და ორი-სამი კვირის ან ერთი თვის შემდეგ დაიწყება დაღმავალი ტალღა.
„ძალიან ბევრი აქვეყნებს პოსტებს, გვთავაზობენ სხვადასხვა მოდელებს. ძირითადად გვთავაზობენ ორ მოდელს: 1. მკაცრი შეზღუდვები, რომელსაც მიმართავს ევროპისა და ამერიკის ქვეყნების უმრავლესობა და გარკვეულწილად ჩვენც მივმართავთ, რათა მინიმუმამდე დავიყვანოთ გარდაცვლილთა და ავადმყოფთა სიხშირე. 2. ლიბერალური პოლიტიკა – მოვხსნათ მკაცრი შეზღუდვები, გავხსნათ ეკონომიკა, ეს ხელს შეუწყობს, რომ ქვეყანა, ეკონომიკა გამოვიდეს რეცესიიდან. ჩვენ კი მოქალაქეების პასუხისმგებლობის გრძნობის იმედზე ვიყოთ, რომ ისინი თვითონ დაიცავენ წესებს. გავრცელდეს ინფექცია, მაგრამ ეს არ არის ტრაგედია, სამაგიეროდ ქვეყანა ეკონომიკური რეცესიიდან გამოვა. ნაწილი ადამიანების დაიღუპება, მეორე ნაწილი იმუნიტეტს შეიძენს და ქვეყანა გახდება იმუნური. ის ქვეყნები კი, რომლებიც შეაჩერებენ გავრცელებას, მუდმივად იქნებიან ამ ეპიდემიის შიშის ქვეშ.
მეორე მოდელი მხოლოდ მოჩვენებით არის მომხიბვლელი. ამ გზამ არ გაამართლა ინგლისში, 13 პროცენტია სიკვდილიანობა. პოპულაციური იმუნიტეტის შეძენა რომ ეფექტური გამოდგეს, სულ ცოტა 2/3 უნდა დაავადმყოფდეს. ანუ საქართველოში 2.5 მილიონი. ინგლისში რომ მართლა გაეშვათ ბოლომდე და 50 მილიონი ადამიანი დაავადებულიყო, დღვანდელი ინგლისის სიკვდილობის მაჩვენებლით 5 მილიონი ადამიანი დაიღუპებოდა. რამდენად ღირს 5 მილიონი ადამიანის სიკვდილი იმად, რომ დანარჩენ მოსახლეობას ჰქონდეს იმუნიტეტი?! ცხადია რომ მცდარი აზრია, მცდარზე მცდარი,” – განაცხადა თენგიზ ცერცვაძემ.
მისივე თქმით, ის იმ აზრს ემხრობა, რომ მკაცრ ზომებს მიმართოს ქვეყანამ, მაგრამ ხანმოკლე დროით.
„რაც უფრო მეტად შევიწუხებთ თავს და მეტად მკაცრად დავიცავთ შეზღუდვებს, მით უფრო ჩქარა მოვხსნით ამას. მე იმედი მაქვს, რომ შევაჩერებთ ეპიდემიას, თუნდაც მკაცრი ზომებით, ამ საგანგებო ზომებით ჩვენ გადავიტანთ პიკის პერიოდს ნაკლები დანაკარგით, ნაკლებად ციცაბო რომ იყოს ეს პიკი და უფრო პლატოს მაგვარი რომ იყოს.
რაც შეეხება შეზღუდვების მოხსნას, ეს პასუხი მომეწონა და გავიმეორებ, არავინ იხსნის პარაშუტს ვარდნის სიჩქარის შემცირებისთანავე, პარაშუტი უნდა მოვიხსნათ, როცა უკვე მიწაზე დავეშვებით,” – განაცხადა ცერცვაძემ.
