თანამედროვე ჩინეთის დიდ ქალაქებში, ავტომობილი ნამდვილ თავის ტკივილად იქცა. ქალაქების ხელისუფალნი და საერთოდ, ქვეყნის მთავრობა, დიდი მონდომებით ცდილობენ სატრანსპორტო მაგისტრალებზე მოძრაობის განტვირთვას, მაგრამ ეს ვერ ხერხდება. საქმეს ვერც მართვის ლიცენზიების გაცემის და ნომრების მიხედვით ქალაქში გამოსვლის შეზღუდვა შველის. სანავიგაციო სისტემების მწარმოებელი კომპანია TomTom-ი ყოველწლიურად აჯამებს საავტომობილო საცობების მონაცემებს და საგზაო საცობების ინდექსებს აქვეყნებს. ახლახანს კი ეს მონაცემები (პირველად) მხოლოდ ჩინეთის ქალაქებისთვის გამოაქვეყნა, რომელმაც იქაურ გზებზე არსებული კატასტროფული მდგომარეობა გამოავლინა. როგორც ანალიზმა აჩვენა, ჩინელი ავტომობილისტები წლის 9 სამუშაო დღეს საცობში ატარებენ.
შარშანდელი სტატისტიკის მიხედვით, ყველაზე „გაჭედილი“ ქალაქი ტიანძინია, სადაც გზები საშუალოდ 56 პროცენტით არის დატვირთული. „ტომ ტომის“ განმარტებით, ეს ნიშნავს, რომ თავისუფალ გზასთან შედარებით, ასეთ გზებზე გადაადგილების დრო დაახლოებით 56 პროცენტით არის გაზრდილი. პიკის საათებში ქალაქის გზების დატვირთვის მაჩვენებელი 95 პროცენტამდე იზრდება. გადატვირთულობის მხრივ, მეორე და მესამე ადგილები ჰანჯოუს და პეკინს უკავია. მათი მაჩვენებლებია შესაბამისად 47 და 43 პროცენტი.
შედარებისთვის, იმავე „ტომ ტომის“ მონაცემებით, ჩრდილოეთ და სამხრეთ ამერიკაში, ყველაზე გადატვირთული ქუჩები ლოს ანჯელესშა, რომლის ქუჩების ტრაფიკის დონე 36 პროცენტია, პიკურ პერიოდში კი 75 პროცენტს აღწევს. და მაინც, ამ მაჩვენებლით, ჩინურ ქალაქებს შორის, ლოს ანჯელესი მე-11 ადგილს გაიყოფდა შენიანთან. სიაში შანჰაის მე-7 ადგილი უკავია.უნდა ითქვას, რომ დიდ ქალაქებში შეზღუდვები ხშირად მეტისმეტად მკაცრია. მაგალითად, პეკინში ავტომობილების რეგისტრაცია საერთოდ შეჩერებულია. მსგავს მეთოდს ასევე შანჰაიშიც მიმართეს, სადაც პარალელურად, ავტომფლობელებს სპეციალურ, საგზაო საცობის გადასახადსაც ახდევინებენ. მაგრამ საქმეს მაინც ვერ უშველეს. ამის მიზეზი კი ისაა, რომ ქალაქში სამუშაოსდ სულ უფრო მეტი ადამიანი მიდის პროვინციებიდან, რაც საბოლოო ჯამში, ქალაქის ქუჩების განტვირთვას შეუძლებელს ხდის.
