ჩვენ დავდივართ დანის პირზე, ოქროს შუალედი უნდა ვნახოთ, ერთი მხრივ, ადამიანების ჯანმრთელობასა და მეორე მხრივ, ბიზნესზე ნაკლებ წნეხს შორის, – ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ ჟურნალისტებს უწყებათაშორისი საკორდინაციო საბჭოს სხდომის დასრულების შემდეგ განუცხადა.
მისივე თქმით, პანდემიების დროს მთავარი ღონისძიება არის შეზღუდვების დაწესება ანუ ინფიცირებული ადამიანების იზოლირება.
„ეპიდსიტუაციის თუ ჯანდაცვის სისტემის შეფასებისას ერთი ინდიკატორი არასდროს გამოიყენება. არის ე.წ. მრავალ ინდიკატორიანი შეფასება ხოლმე, რომელსაც ვეყრდნობით. ზოგადად, ჯანდაცვის სისტემის განვითარება, ეპიდსიტუაციის შეფასება. ახლა გეუბნებით 4%-იან ინდიკატორს, მეორე არის ინციდენტობა ანუ 100 ათას მოსახლეზე ახალი შემთხვევები, შემდეგ არის როგორია ჰოსპიტალური დატვირთვა, როგორია ინტენსიურსა და რეანიმაციაში ადამიანთა ოდენობა და მისი დინამიკა, რამდენი თავისუფალი საწოლი გვაქვს, ყველაფერი ეს და კიდევ მრავალი, ფასდება, რომლის საშუალებითაც გადაწყვეტილება უნდა იქნას მიღებული. ეს არ არის მხოლოდ ეპიდსიტუაცია, ეს არის მრავლობითი ინდიკატორული შეფასება, რომლის მიხედვითაც, გადაწყვეტილება უნდა იქნას მიღებული. ჩვენთვის ამოსავალი წერტილი არის სიცოცხლისა და ჯანმრთელობის უფლება. ისეთი რამ არ უნდა გავაკეთოთ, რომ უცებ შემთხვევებმა მოიმატოს და ისევ ხელმეორედ შეზღუდვების საჭიროება გახდეს. ნოემბრის ბოლოს შეზღუდვების დაწესება აუცილებელი იყო. პანდემიების დროს მთავარი ღონისძიება არის შეზღუდვების დაწესება ანუ ინფიცირებული ადამიანების იზოლირება. ეს არის მარტივი ჭეშმარიტება. ჩვენ დავდივართ დანის პირზე, ოქროს შუალედი უნდა ვნახოთ, ერთი მხრივ ადამიანების ჯანრმთელობასა და მეორე მხრივ ბიზნესზე ნაკლებ წნეხს შორის”, – განაცხადა ამირან გამყრელიძე.
ცნობისთვის, ამ წუთებში მთავრობის ადმინისტრაციაში ბიზნესის წარმომადგენლებთან შეხვედრა მიმდინარეობს.
