ესპანური კლუბი „Levante UD“, სადაც საქართველოს ნაკრების ფეხბურთელი გიორგი ქოჩორაშვილი თამაშობს, ევრო 2024-ის მიმდინარეობის პერიოდში საქართველოს მხარდამჭერი განცხადებებით გამოირჩეოდა და თანაც პოსტებს ქართულ ენაზე აქვეყნებდა.
„ლევანტეს“ ოფიციალური გვერდის ადმინისტრატორი, როგორც ცნობილია ხავი დე ლა ოსა გახლავთ. მან ევროპის ჩემპიონატის დასრულების შემდეგაც არ შეწყვიტა ქართული ფეისბუკ პოსტების დადება, მეტიც მან ქართული კერძებიც დააგემოვნა.
ხავი დე ლა ოსა საქართველოში იმყოფება. მან მცხეთაში ჯვრის მონასტერი მოინახულა, საიდანაც ლევანტეს ოფიციალურ ფეისბუკ გვერდზე ახალი ფოტო გამოაქვეყნა.
საქართველოში Levante UD-ის საერთაშორისო ურთიერთობების აღმასრულებელ დირექტორთან ერთად ქართველი ტალანტების აღმოსაჩენად ჩამოვიდა.
„ქართული კულტურის გაცნობა მინდა, ეს ახალია ჩემთვის. ქვეყანა უნდა ვნახო. ინტერნეტში რაც მოგვწერეს, იმ სიყვარულის ნახვა გვინდა. ჩვენი დიდი სურვილი იყო, რომ საქართველოში ჩამოვსულიყავით. ქართველი ბავშვების, ტალანტების სანახავად ვართ ჩამოსული. მათგან 10 რჩეული ვალენსიაში წამოვა.
გიორგი ქოჩორაშვილი ძალიან გამორჩეული მოთამაშეა, ძალიან ქარიზმატულია. გაცნობისთანავე შეგვიყვარდა და მოგვწონს ეს მოთამაშე. ახლა გაიზარდა ეს ბიჭი, უფრო ძლიერია და ევროპაშიც იცნობენ. მან „ლევანტეს“ პატივისცემა დაიმსახურა“, – განაცხადა ხავიმ.
საქართველოში ჩამოსვლამდე Levante UD-მა განცხადება გაავრცელა, სადაც აღნიშნა, რომ ესპანური კლუბის წარმომადგენლები საქართველოში 2006-2011 წლებში დაბადებულ ტალანტებს შეარჩევენ და მათ მოგზაურობას საქართველოს ტურიზმის ეროვნული სააგენტო უზრუნველყოფს.
