ზაფხულის არდადეგები სრულდება და ბავშვები რეჟიმს უბრუნდებიან. 2026-2027 სასწავლო წელი საქართველოს საჯარო სკოლებში და თბილისის საჯარო საბავშვო ბაგა-ბაღებში 15 სექტემბერს დაიწყება.
სასწავლო წლის დაწყება განსაკუთრებით ემოციური პერიოდია როგორც ბავშვებისთვის, ისე მშობლებისთვის. ზოგიერთ ბავშვს ახალი რეჟიმთან შეგუება მარტივად შეუძლია, ზოგისთვის კი დილით ადრე გაღვიძება, მშობელთან განშორება და დღის ახალი განრიგი დამატებით სტრესთან არის დაკავშირებული.
რა უნდა გააკეთონ მშობლებმა წინასწარ?
პირველ რიგში, სასურველია, ბავშვმა რამდენიმე დღით ადრე დაიწყოს ძილისა და გაღვიძების რეჟიმის მოწესრიგება. თუ ზაფხულში გვიან იძინებდა და გვიან იღვიძებდა, რეჟიმის ერთბაშად შეცვლამ შესაძლოა დაღლილობა და გაღიზიანება გამოიწვიოს.
მნიშვნელოვანია ასევე, რომ მშობელმა ბავშვს წინასწარ აუხსნას, როგორ ჩაივლის მისი დღე როდის წავა სკოლაში ან ბაღში, ვის შეხვდება, როდის დაბრუნდება სახლში. ეს განსაკუთრებით ეხმარება იმ ბავშვებს, რომლებიც პირველად მიდიან ბაღში ან სკოლაში.
ფსიქოლოგები ხშირად ურჩევენ მშობლებს, ბავშვის შფოთვას ფრაზებით „არაფერია სანერვიულო“ არ უპასუხონ. უმჯობესია, ბავშვს მოუსმინონ და უთხრან, რომ მისი განცდები ნორმალურია.
ბაღში პირველად მიმავალ ბავშვებს კი განსაკუთრებით სჭირდებათ მშვიდი და თანმიმდევრული განშორება. მშობლის ხანგრძლივმა დამშვიდობებამ ან ბავშვის ფარულად დატოვებამ შესაძლოა შფოთვა უფრო გააძლიეროს. უმჯობესია, დამშვიდობება იყოს მოკლე, თბილი და წინასწარ შეთანხმებული.
ამასთან, პირველ დღეებში ბავშვისგან იდეალურ ქცევასა და სწრაფ ადაპტაციას არ უნდა მოველოდოთ. ზოგიერთს ახალ გარემოსთან შესაგუებლად რამდენიმე დღე, ზოგიერთს კი რამდენიმე კვირა სჭირდება.
2026-2027 სასწავლო წელი სკოლებში 15 სექტემბერს იწყება. პირველი სემესტრი 29 დეკემბერს დასრულდება, რის შემდეგაც ზამთრის არდადეგები დაიწყება.
