საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ (სემეკ) დღეს გამართულ საჯარო სხდომაზე ბუნებრივი გაზის სექტორში მოქმედი კომპანიებისათვის გეგმური ტარიფების დადგენის მიზნით საჯარო ადმინისტრაციული წარმოებები დაიწყო. ამის შესახებ სემეკიდან იუწყებიან.
მათი ინფორმაციით, საჯარო ადმინისტრაციული წარმოებების დაწყება წარმოადგენს სატარიფო მეთოდოლოგიით გათვალისწინებულ გეგმურ პროცესს, რომელსაც სემეკი ბუნებრივი გაზის სექტორში ყოველწლიურად ახორციელებს.
„საჯარო ადმინისტრაციული წარმოებები დაიწყო შპს „საქართველოს გაზის ტრანსპორტირების კომპანიის“ სატარიფო განაცხადის გეგმური გადახედვის ფარგლებში, ბუნებრივი გაზის ტრანსპორტირების ტარიფის დადგენის მიზნით;
შპს „ყაზტრანსგაზ თბილისის“, შპს „სოკარ ჯორჯია გაზის“, სს „საქორგგაზის“, სს „ენერგოკავშირის“, შპს „ვარკეთილაირის“, სს „საჩხერეგაზის“, შპს „ტაბას“, შპს „არზუ გაზის“, შპს „თელავგაზის“ სატარიფო განაცხადების გეგმური გადახედვის ფარგლებში ბუნებრივი გაზის მიწოდების, განაწილების დაა მოხმარების ტარიფების დადგენის მიზნით;
ამასთანავე, საჯარო ადმინისტრაციული წარმოებები დაიწყო ელექტროენერგიის მწარმოებელი კომპანიების – შპს „გარდაბნის თბოსადგურის“, შპს „ჯიფაუერის“ სატარიფო განაცხადების გეგმური გადახედვის ფარგლებში გარანტირებული სიმძლავრის საფასურისა და გარანტირებული სიმძლავრის წყაროს ელექტროენერგიის წარმოების ტარიფების დადგენის მიზნით“, – ნათქვამია ინფორმაციაში.
საჯარო ადმინისტრაციული წარმოებების წესის შესაბამისად, კომისიაში წინადადებების წარმოდგენის ვადად განისაზღვრა 2019 წლის 1 ოქტომბერი, ხოლო გადაწყვეტილების მიღების ბოლო ვადად 2019 წლის 31 დეკემბერი.
საჯარო ადმინისტრაციული წარმოებების დაწყების შესახებ დეტალური ინფორმაცია განთავსებულია კომისიის ვებ გვერდზე www.gnerc.org.
დღესვე სემეკის სხდომაზე ხმაური იყო. ერთმანეთს სიტყვიერად „ლეიბორისტული პარტიის” წევრი გიორგი გუგავა და სემეკი-ს წევრი გიორგი ფანგანი დაუპირისპირდნენ. მოგვიანებით კამათში სემეკი-ს სხვა წევრებიც ჩაერთნენ.
ხმაური სხდომაზე მას შემდეგ დაიწყო, რაც გიორგი გუგავამ განცხადება გააკეთა და სემეკი-ს წევრებს გაზის ტარიფზე კითხვები დაუსვა.
