საქართველო ოკუპირებული აფხაზეთის გავლით რუსეთისკენ ტვირთებს არ გაატარებს – განაცხადა „ოცნების“ მთავრობის პრემიერ-მინისტრმა ირაკლი კობახიძემ მთავრობის ადმინისტრაციაში გამართულ პრესკონფერენციაზე ჟურნალისტის კითხვის საპასუხოდ.
საქმე ეხება „ეხო კავკაზას“ გავრცელებულ ინფორმაციას, რომელშიც ტვირთების გადაზიდვისთვის ენგურის ხიდთან ახალი საბაჟო ტერმინალის ინფრასტრუქტურულ მზაობაზეა საუბარი. გამოცემის ცნობით, ტრანზიტულ-ლოგისტიკური კომპანიის გენერალურმა დირექტორმა და რუსეთის პრეზიდენტის ინიციატივით შექმნილი ევრაზიული ინტეგრაციის პლატფორმის – “მსოფლიო ხალხთა ასამბლეის” ხელმძღვანელმა ოკუპირებულ აფხაზეთში – ასტამურ ახსალბამ, ადგილობრივ გამოცემასთან, ენგურზე აგებული ახალი ტერმინალის შესახებ დეტალურად ისაუბრა და აღნიშნა, რომ მშენებლობა თითქმის დასრულებულია და ოკუპირებული სოხუმი ტვირთების ტრანზიტის დასაწყებად „ჰიპოთეტიკურად მზად არის“.
ირაკლი კობახიძე გავრცელებულ ინფორმაციას სპეკულაციას უწოდებს და ამბობს “ჩვენ არავითარ სახელმწიფო საზღვარს არ ვაღიარებთ. ეს სრული სიყალბეა. ჩვენი მხრიდან ამაზე საუბარი ვერ იქნება. წინა ხელისუფლების პირობებში ხელი მოეწერა ხელშეკრულებას კონკრეტულ შეთანხმებას, რომლის საფუძველზეც მაშინდელმა ხელისუფლებამ თანხმობა მისცა რუსეთს მსოფლიო სავაჭრო ორგანიზაციაში გაწევრიანებაზე და მაშინ იყო შეთანხმება, რომ შვეიცარიის შუამავლობით უნდა შექმნილიყო ტვირთების გადაზიდვის შესაძლებლობა. მას შემდეგ ეს საკითხი გაჩერებულია და ჩვენი მხრიდან ამ მიმართულებით არც ერთი ნაბიჯი არ გადადგმულა. აქედან გამომდინარე ეს ყველაფერი სპეკულაციაა“.
ირაკლი კობახიძე აცხადებს, რომ ოკუპირებული ტერიტორიების შესახებ კანონი ძალაშია, რომლის მიხედვითაც აფხაზეთის გავლით ტვირთების გატარება აკრძალულია. პრემიერი აცხადებს, რომ ამ მიმართულებით მთავრობას ახალი ინიციატივები არ აქვს.
კითხვაზე – ანუ არ გაატარებთ ტვირთებს რუსეთისთვის, ირაკლი კობახიძე პასუხობს: „გიდასტურებთ, რომ არ გავატარებთ“.
