თბილისში ღამით განვითარებულ მოვლენებს „Amnesty International“-ის ერთ-ერთი ხელმძღვანელი გამოეხმაურა. ევროპისა და ცენტრალური აზიის ადვოკაციის დირექტორმა დენიელ ბალსონსმა თავისი მოსაზრებები Twitter-ზე გამოაქვეყნა.
მისი თქმით, საქართველოს ხელისუფლებამ უნდა იცოდეს, რომ შეერთებული შტატების ოფიციალური პირები თბილისში მიმდინარე პროცესებს აკვირდებიან. ბალსონის განცხადებით, ვაშინგტონში აუცილებლად შეამჩნევენ, როგორ ეპყორბიან სამართალდამცველები დემონსტრანტებს.
Gov’t officials in Georgia 🇬🇪 like @GakhariaGiorgi, @GeorgianEmbassy, etc should know that U.S. gov’t officials are closely following events in Tbilisi. Just one example below.
How security services treat demonstrators will be noticed in Washington. https://t.co/Yx6BiODttj
— Daniel Balson (@EurasiaView) November 26, 2019
ბალსონის ადრესატები საქართველოს პრემიერ მინისტრი და შტატებში საქართველოს ელჩი არიან. უფლებადამცველს მაგალითისთვის კონგრესმენი ადამ კინზინგერი მოჰყავს, რომელიც წერდა, რომ შოკშია პარლამენტის მიერ პროპორციული საარჩევნო სისტემის ჩაგდების გამო. ღამით აქციის დაშლამდე ცოტა ხნით ადრე, ბალსონსი წერდა, რომ შეიარაღებულმა ძალებმა დემონსტრანტების მშვიდობიანი შეკრებისა და გამოხატვის უფლებას პატივი უნდა სცენ.
სპეცრაზმი პარლამენტთან დაახლოებით დილის 05:00 საათზე გამოჩნდა. მათ აქციის მონაწილეებს პარლამენტის შესასვლელები დაატოვებინეს. გამოყენებული იყო წყლის ჭავლიც. რუსთაველის გამზირზე მეეზოვეებმა გზა დაასუფთავეს. აღდგა საავტომობილო მოძრაობაც.
ამ დროისთვის აქციის მონაწილეები პარლამენტის შენობის წინ არიან შეკრებილები. ისინი აცხადებენ, რომ დაშლას არ აპირებენ. მათთან ერთად არიან ოპოზიციური პარტიის ლიდერებიც. პარლამენტის შესასვლელებთან სპეცრაზმია მობილიზებული.
პარლამენტში დღეს ბიუროსა და პლენარული სხდომებია ჩანიშნული. აქციის მონაწილეებიის მიზანია, დღეს დეპუტატები პარლამენტში არ შეუშვან.
„ქართული ოცნების“ გენერალურმა მდივანმა, თბილისის მერმა კახა კალაძემ 25 ნოებერს თქვა, რომ 2020 წლის არჩევნები შერეული საარჩევნო სისტემით ჩატარდება, ასევე განაცხადა, რომ „ქართული ოცნება“ რიგ საარჩევნო ოლქში მაჟორიტარობის კანდიდატებს არ დააყენებს.
ოპოზიციამ კი არჩევნების „გერმანული მოდელით“ ჩატარებასთან დაკავშირებით კანონპროექტი შეიმუშავა.
14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. მათ შორის იყო მარიამ ჯაშიც.
მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება – კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.
