კითხვაზე, შესაძლოა თუ არა საქართველოს კანდიდატის სტატუსის მიღების პროცესი ისევე დაჩქარდეს, როგორც ეს შესაძლოა უკრაინის შემთხვევაში მოხდეს, გერმანიის ელჩმა აღნიშნა, რომ გაწევრიანების გზა გრძელია და ამ გზაზე ბევრი ამოცანა შესასრულებელი, ხოლო რეფორმა კი განსახორციელებელი იქნება.
მისი თქმით, მომდევნო წლებში ნათელი გახდება, თუ ვინ შეძლებს ამ ამოცანების შესრულებას.
,,ის, რაც ახლა, რამდენიმე კვირაში ევროპის საბჭომ შეიძლება გადაწყვიტოს, არის ამ გზის დასაწყისი, არის გადაწყვეტილება, რომ ჩვენ ერთად გვინდა ამ გზის გავლა, რათა ეს ქვეყნები გახდნენ ევროკავშირის წევრები. ამ გზაზე ბევრი ამოცანა იქნება შესასრულებელი, ბევრი რეფორმა იქნება გასატარებელი სამივე ქვეყანაში.
უკრაინაში ეს ამჟამად ძნელი განსახორციელებელია აქტუალური საომარი სიტუაციის პირობებში. მომდევნო წლებში ნათელი გახდება, ვინ შეძლებს ამ ცვლილებების განხორციელებას, ამ რეფორმების გატარებას, რომლებიც ქვეყნებს ისე შეცვლიან, რომ ისინი შეძლებენ ევროკავშირის წარმატებული წევრი ქვეყნები გახდნენ“, -აღნიშნა ჰუბერტ ქნირშმა.
ამასთან, დიპლომატი აღნიშნავს, რომ საქართველოს და უკრაინას შორის დაძაბულობა ახლა დროული არ არის და ყველა ქვეყნის პოლიტიკოსი უნდა დაფიქრდეს გამონათქვამებზე.
,,მართლაც სამწუხაროა, რომ ურთიერთობები საქართველოსა და უკრაინას შორის ამჟამად დაძაბულია და ეს ხდება იმ დროს, როდესაც ჩვენ გვაქვს უფრო დიდი პრობლემები და როდესაც ქართველი ხალხი ასე ნათლად და მრავალმხრივ გამოხატავს თავის სოლიდარობას და მხარდაჭერას უკრაინის მიმართ.
იმედი მაქვს, რომ ეს დაძაბულობა სამთავრობო დონეზე მალე განიმუხტება, რომ საერთო ინტერესები დაძლევს ამ დაძაბულობას და ევროკავშირისაკენ გასავლელი საერთო გზა იქნება ამისათვის მოტივაცია.
ყველა ქვეყნის პოლიტიკოსები კარგად უნდა დაფიქრდნენ თავიანთ გამონათქვამებზე და საჯაროდ არ უნდა გააჟღერონ ის, რაც სრულიად უადგილო ტვირთად აწვება საქართველოსა და უკრაინას შორის არსებულ ურთიერთობებს“, – განაცხადა ელჩმა.
ჰუბერტ ქნირშმა ასევე განმარტა, თუ რატომ ვერ აღმოჩნდა საქართველოს საგარეო საქმეთა მინისტრი ერთი კვირის წინ, გერმანიაში გამართულ ,,დიდი შვიდეულის“ სამდღიან სამიტზე, სადაც მიწვეული იყვნენ უკრაინისა და მოლდოვის საგარეო საქმეთა მინისტრები და აღნიშნა, რომ უკრაინა აწარმოებს ომს საკუთარ ტერიტორიაზე, მოლდოვას კი უხდება ლტოლვილების დიდ ნაკადთან გამკლავება.
მისი თქმით, საქართველო დაპატიჟებული იქნება ნატოს სამიტზე მადრიდში უკრაინასთან ერთად, რაც დადასტურება იქნება იმის, რომ ნატო და ევროპა საქართველოს სიტუაციას დიდ ყურადღებას აქცევს.
,, რუსეთის ეს ომი უკრაინის წინააღმდეგ ეხება მართლაც ყველა ქვეყანას ევროპაში, უსაფრთხოებას მთელს ევროპაში. ვიცით, რომ ეს საქართველოს განსაკუთრებით ეხება იმ სიტუაციაში, რომელიც თქვენ აღწერეთ.
ამ ჯერზე დაპატიჟებული იყო უკრაინაც, როგორც სტუმარი, ასევე მოლდოვა. უკრაინა აწარმოებს ომს საკუთარ ტერიტორიაზე, თავს იცავს აგრესიისაგან, მოლდოვას კი უხდება ლტოლვილების დიდ ნაკადთან გამკლავება და მძიმე შრომა უწევს იმისათვის, რომ შეძლოს მათი გამოკვება და დაბინავება.
საქართველო თავის მხრივ დაპატიჟებული იქნება რამდენიმე კვირაში ნატო-ს სამიტზე უკრაინასთან ერთად და ეს აჩვენებს, რომ ნატო და ევროპა დიდი ყურადღებას აქცევს საქართველოს სიტუაციას “, – განაცხადა ელჩმა.
