პრეზიდენტმა შეწყალებაზე მორატორიუმი გამოაცხადა. ეს მას შემდეგ, რაც საზოგადოებაში, საქართველოს პრეზიდენტის მიერ მკვლელობისათვის მსჯავდბულების შეწყალებამ უკმაყოფილება გამოიწვია.
პრეზიდენტის ამ გადაწყვეტილებსა და მორატორიმის გამოცხადებას მმართველ გუნდსა და ოპოზიციაში კრიტიკული გამოხმაურებები მოჰყვა.
“თუ სალომე ზურაბიშვილს ვიღაცამ “გაუჩალიჩა” ეს შეწყალებები, მაშინ მან უნდა გააკეთოს განმარტება, ვინ იყო ეს პირი. მინდა მჯეროდეს, რომ მას “გაუჩალიჩეს,” – ამის შესახებ საპარლამენტო უმრავლესობის წევრმა ვანო ზარდიაშვილმა ჟურნალისტებს განუცხადა, მისი თქმით, საქართველოში პრეზიდენტის მიერ მსჯავრდებულების შეწყალებამ ძალიან მახინჯი ფორმა მიიღო.
“შეწყალებასთან დაკავშირებით, კოორდინირებულად უნდა დაიწყოს მუშაობა ერთიანი სისხლის სამართლის პოლიტიკის შემუშავების თვალსაზრისით,”- ამის შესახებ იურიდიულ საკითხთა კომიტეტის თავმჯდომარემ ანრი ოხანაშვილმა განაცხადა. მისივე განმარტებით, პრეზიდენტს შეწყალების უფლება ვერ შეეზღუდება, მაგრამ შესაძლებელია ამ საკითხზე მუშაობა დაიწოს და ერთიანი პრინციპების შემუშავება მოხდეს.
„სალომე ზურაბიშვილმა განაცხადა, რომ შეწყალება “მისი სუბიექტური” გადაწყვეტილებაა. ალბათ, უნდოდა ეთქვა, რომ პრეზიდენტის აბსოლუტური დისკრეციაა. ამასთანავე, თქვა, რომ უუნაროა და შემიზღუდეთ ეს აბსოლუტური უფლებაო. პირიქითაა, შეწყალება უნდა იყოს აბსოლუტური დისკრეცია, უბრალოდ ეს დღეს აბსოლუტური იდიოტის ხელშია. კანონი კი არაა შესაცვლელი, სალომე ზურაბიშვილია სასახლიდან გამოსაძევებელი. შეუძლებელია! ათონელზე ზის “მაიმუნი გახსნილი ლიმონკით,”- აღნიშნავს გიგი უგულავა და სალომე ზურაბიშვილის იმპიჩმენტს მოითხოვს.
„შეწყალებასთან დაკავშირებით კანონმდებლობა და წესები კი არა, პრეზიდენტია შესაცვლელი“, – ამის შესახებ ფრაქცია „ნაციონალური მოძრაობის“ თავმჯდომარე რომან გოცირიძემ განაცხადა. მისი თქმით, მორატორიუმის გამოცხადება სალომე ზურაბიშვილის მხრიდან საკუთარი შეცდომების გამოსწორების არასერიოზული მცდელობაა.
“ჩემთვის აბსოლუტურად მიუღებელია პოლიციელის მკვლელის და საერთოდ მკვლელის, მძიმე დანაშაულის ჩამდენი პირების მსგავსი შეწყალება, – ამის შესახებ პრემიერ-მინიტრმა გიორგი გახარიამ ჟურნალისტებს განუცხადა. როგორც გახარიამ აღნიშნა, შეწყალების მექანიზმებს სჭირდება საკანონმდებლო ცვლილებები, რის აუცილებლობაზეც პრეზიდენტმაც ისაუბრა.
ეს არ არის შეცდომა, ეს არის არჩევანი. ჩვენ ვიმკით ივანიშვილის და “ქართული ოცნების” უტიფარი ძალადობის შედეგებს ამომრჩეველზე,- ამის შესახებ “ევროპული საქართველოს” ერთ-ერთმა ლიდერმა გიგა ბოკერიამ პრეზიდენტის მიერ მკვლელობისთვის მსჯავრდებულთა შეწყალების შესახებ განაცხადა. მისი თქმით, საქმეზე უნდა დაიწყოს გამოძიება და თუ გამოიკვეთება დანაშაულის ნიშნები, დაიწყოს იმპიჩმენტის პროცედურა.
რეგიონული განვითარებისა და ინფრასტრუქტურის მინისტრი მაია ცქიტიშვილი პრეზიდენტ სალომე ზურაბიშვილის გადაწყვეტილებას შეწყალებაზე მორატორიუმის გამოცხადებასთან დაკავშირებით, მიესალმება. მისივე თქმით, შეწყალების პროცედურა საზოგადოებაში კითხვებს არ უნდა აჩენდეს.
