გუშინ, ჩემპიონთა ლიგის 1/4 ფინალური ეტაპის პირველ მატჩში, ხვიჩა კვარაცხელიას პსჟ საკუთარ მოედანზე „ასტონ ვილას“ დაუპირისპირდა და 3:1 დაამარცხა. გამორჩეული მატჩი ჰქონდა ქართველ ფეხბურთელს. ხვიჩა კვარაცხელია პარიზელთა სასტარტო შემადგენლობაში იყო და ლუის ენრიკემ თამაშის დასრულებამდე რამდენიმე წამით ადრე შეცვალა. ხვიჩა მთელი მატჩის განმავლობაში აქტიურობდა და პსჟ-ის გამარჯვებაში უდიდესი როლი ითამაშა. მეორე ტაიმის დებიუტში, როდესაც ანგარიში 1:1 იყო, ქართველმა შემტევმა თავისი გუნდი ბრწყინვალე გოლით დააწინაურა, შეხვედრის მიწურულს კი მატჩის საუკეთესო ფეხბურთელის ჯილდოც მიიღო.
თამაშის დასრულების შემდეგ ფრანგულმა მედიამ ხვიჩას თამაში უმაღლესი ქულით შეაფასა.
L’Equipe – 7 ქულა: სწორედ ამიტომ არის ქართველი უნიკალური მოთამაშე. მის ტექნიკაში არის რაღაც მოძველებული, მაგრამ თვალებს უდიდეს დღესასწაულს ანიჭებს. უაღრესად მობილური, ნაყოფიერი და ეფექტურია. ყოფილი ნეაპოლიტანელი შეზღუდულ სივრცეებში თამაშითაც აღფრთოვანებული იყო. პირველ ტაიმში შედარებით შეზღუდული იყო, მაგრამ მეორე ნახევარი ზღაპრულად დაიწყო. შეხვედრის ბოლომდე ყველაზე აქტიურად უტევდა და ამავდროულად, დაცვის დახმარებაზეც არ ამბობდა უარს.
Le Parisien – 8 ქულა: მაშინვე დავინახეთ მისი ფეხების სიძლიერე და ის, რომ ამ მატჩში მნიშვნელოვანი როლი ექნებოდა. თავის გადაწყვეტილებებში მუდამ ზუსტი იყო, საცოდავი ქეშისთვის ნამდვილი შხამი იყო. სწორედ კვარას გამო შეცვალა მატიასი მეორე ტაიმში დისასმა, რომელსაც შესაძლოა, უარესი განსაცდელიც კი ელოდა. ქართველმა გოლის ეპიზოდში სწორედ ფრანგი ჩამოიშორა და ბრწყინვალე დარტყმით დიდებული გოლი გაიტანა. ამის შემდეგაც, ინტენსივობის იგივე დონე გააგრძელა.
Eurosport – 7.5 ქულა: ქართველს მთელი პირველი ტაიმი ბურთი ფეხებთან ჰქონდა, რათა თამაშში განსხვავება შეეტანა და ასტონ ვილას ფეხბურთელების ჩასახშობად სერიოზულ სამუშაოს აკეთებდა. პირველ ტაიმში, რამდენიმე მცდელობის შემდეგ მიზანს მეორე ტაიმის დაწყებისთანავე მიაღწია. მეორე ნახევარი შედევრით დაიწყო და ალექს დისასის მოტყუების შემდეგ მარცხენა ფეხით კარის ზედა კუთხეში ბრწყინვალე გოლი გაიტანა.
Footmercato – 7.5 ქულა: მატჩის საუკეთესო მოთამაშე! თამაში მაშინვე ეფექტურად დაიწყო, როდესაც ბრწყინვალე მოძრაობით მატი ქეშს წესები დაარღვევინა და მსაჯს გააფრთხილებინა. ყოფილი ნეაპოლი მუდმივად ბურთთან ერთად მოძრაობდა და ამ საღამოსაც ეს ბრწყინვალედ გამოსდიოდა. მეორე ნახევარში ფანტასტიკური გოლითაც დაჯილდოვდა, როდესაც მარჯვენა ფეხით ბრწყინვალე დრიბლინგი შეასრულა და შემდეგ მარტინესის კარი მარცხენა ფეხით გასროლით აიღო. ამის შემდეგ, ქართველმა აქტიურობა გააგრძელა და კიდევ რამდენიმე შანსი ჰქონდა. საბოლოოდ, ის ბოლო წამებზე გონსალუ რამუშმა შეცვალა.
Maxifoot – 8 ქულა: ქართველმა გარემარბმა შესანიშნავი მატჩი ჩაატარა! მარცხენა ფეხით შესანიშნავი გოლი გაიტანა, რომელსაც წინ მარჯვენა ფეხით ბრწყინვალე დრიბლინგი უძღოდა. ამით, მან თავისი გუნდი დააწინაურა. მისმა დრიბლინგებმა და სირბილმა ასტონ ვილას დაცვა ძალიან დააზარალა. გარდა შეტევაში ბრწყინვალებისა, ქართველი დაცვით ფაზაშიც დიდი შრომით გამოირჩეოდა და ინგლისელთა კონტრშეტევების განვითარებას ხელს უშლიდა.
მიმდინარე სეზონში, ხვიჩა კვარაცხელიამ პსჟ-ის მაისურით ჩემპიონთა ლიგაზე მეორე გოლი გაიტანა, პირველად კი ეს „ბრესტის“ წინააღმდეგ, პლეი-ინში შეძლო. საერთო ჯამში, „ასტონ ვილასთან“ გატანილი გოლი ხვიჩას პარიზულ კარიერაში მეოთხე იყო. პსჟ-სა და „ასტონ ვილას“ შორის ჩემპიონთა ლიგის 1/4 ფინალური ეტაპის საპასუხო შეხვედრა 15 აპრილს ბირმინგემში გაიმართება და თბილისის დროით 23:00 საათზე დაიწყება.
წყარო: CrystalSport
