ქუთაისის მერიაში გუშინ განვითარებულ მოვლენებს „ნაციონალიური მოძრაობის“ წევრი გიგა შუშანია ეხმიანება.
მან დღეს ბრიფინგი გამართა და ფაქტთან დაკავშირებით გამოძიების დაწყება მოითხოვა.
„მაშინ, როდესაც ქუთაისის მერი გვერდით ოთახში იმალებოდა, ჩვენ ვნახეთ, რომ ჟურნალისტს დაცვამ მიაყენა ფიზიკური დაზიანები, მოხდა პოლიციის მიერ მისი შენობიდან იძულებით გაყვანა. ჟურნალისტის საქმიანობა არის დაცული კანონმდებლობით და მათ შორის კანონითაა დაცული და მისი მოვალეობაა, აკონტროლოს ადმინისტრაციული ორგანოს საქმიანობა და თავისუფლად გადაადგილდეს შენობაში, ჩვენ მოვუწოდებთ ხელისუფლებას სასწრაფოდ დაიწყოს ფაქტზე გამოძიება და საჯარო გახადოს მასალები“, – განაცხადა გიგა შუშანიამ.
გუშნინ, 5 აპრილს ქუთაისის მერიის შენობაში “ქუთაისი თუდეის” რედაქტორმა მერის კაბინეტთან შიმშილობა გამოაცხადა, რა დროსაც საპატრულო პოლიციამ ის შენობიდან იძულებით გაიყვანა, უგონო მდგომარეობაში მყოფი ჟურნალისტს ბორკილები დაადო და საპატრულო პოლიციაში გადაიყვანა, სადაც სასწრაფო გამოიძახეს და ჟურნალისტი საავადმყოფოში გადაიყვანეს. ბუბა ჩივაძემ მერთან შესვლას ითხოვდა, თუმცა, მისი თქმით, მერიის დაცვამ ფიზიკური შეურაცხყოფა მიაყენა.
ჟურნალისტს ადმინისტრაციულ სამართალდამცავთა კოდექსის 173-ე მუხლი წარუდგინეს, რაც პოლიციელის კანონიერი ბრძანებისადმი დაუმორჩილებლობას გულისხმობს და ჯარიმას ან 15 დღემდე პატიმრობას ითვალისწინებს.
თავის მხრივ, ბუბა ჩივაძე პოლიციას არაადამიანურ მოპყრობაში ადანაშაულებს და აცხადებს, რომ ქუთაისის მერის ნათესავებისა და მეგობრების ბიზნესინტერესების თემაზე მუშაობდა, რის გამოც მერიაში არ შეუშვეს.
ქუთაისის მერიაში კი აცხადებენ, ადმინისტრაციულ შენობაში შესასვლელად საჭირო გახდა საშვის მიღება, თუმცა ამ წესის ამოქმედების შესახებ მედიისათვის ინციდენტის შემდეგ გახდა ცნობილი.
