“გთხოვ მასუნთქე”, “ჟანგბადი გვჭირდება”, “ვერ ვაზროვნებთ”- ქუთაისში აბიტურიენტებმა აქცია გამართეს. ისინი საგამოცდო პროცესის პირბადის გარეშე ჩატარებას ითხოვენ. როგორც აბიტურიენტები ამბობენ, მაგიდები სპეციალური ბარიერებით იქნება აღჭურვილი და პირბადის გამოყენება აუცილებელი აღარ იქნება. აქციის მონაწილეების განცხადებით, პირბადის ტარება ორგანიზმში ჟანგბადის ნაკლებობას იწვევს, რაც აბიტურიენტისთვის დისკომფორტის შემქმნელია.
აქციას სტუდენტური ომბუდსმენის წარმომადგენლებიც შეუერთდნენ.
“ერთი თვეა, რაც განათლების სამინისტროსთან უშუალო კომუნიკაცია გვაქვს. მას შემდეგ, რაც ცნობილი გახდა, რომ აბიტურიენტებმა გამოცდა პირბადეებით უნდა დაწერონ, ჩვენ სამინისტროს მივმართეთ და ალტერნატივებიც შევთავაზეთ. სამწუხაროდ, უარყოფითი პასუხი მივიღეთ. დღეს ჩამოვედით ქუთაისში და აქედან მოვუწოდებთ განათლების სამინისტროს, ჯანდაცვის სამინისტროს რეკომენდაციები გაითვალისწინოს, რომ ამ შემთხვევაში პირბადის ტარება აუცილებელი არ არის. წელავენ დროს და გამოცდები კი ახლოვდება. ვუყენებთ ულტიმატუმს, რომ თუ ერთ დღეში არ გვიპასუხებენ, უფრო ფართომასშტაბიან აქციებს გავმართავთ,”-ამბობს სტუდენტური ომბუდსმენის ხელმძღვანელი, თაკო მეტრეველი.
აბიტურიენტებმა იმავე მოთხოვნებით ერთი საპროტესტო აქცია მიმდინარე თვეში ქუთაისში უკვე გამართეს.
