,,საზოგადოების მაღალი ინტერესიდან გამომდინარე, გვსურს მოგაწოდოთ ინფორმაცია ამ დროისთვის ჩვენთვის ცნობილი გარემოებების შესახებ.
ჩვენ ხელთ არსებული ინფორმაციისა და გამოძიების მიმდინარეობის მიხედვით, კამერებში ჩანს, რომ ჩემი მამიდა მზია ლომაია დილით სახლიდან გავიდა და ქუთაისში, რიონჰესის მიმართულებით წავიდა. დაფიქსირებულია, რომ იგი ხიდზე გადადის, რის შემდეგაც მისი კვალი იკარგება. სამწუხაროდ, იმ ტერიტორიაზე ვიდეოკამერების გაგრძელების – წვდომა აღარ ვრცელდება, რის გამოც უცნობია, დატოვა თუ არა მან რიონჰესის ტერიტორია.
ასევე დაგვიკავშირდა ქალბატონი, რომელიც სავარაუდოდ ახლომდებარე საავადმყოფოში მუშაობს. მისი თქმით, იგი ყოველ დილით სწორედ ამ ხიდზე გადადის და გუშინ დილას დაინახა ჩუსტები, რომლებიც მამიდას ეცვა. მოგვიანებით კი, სამწუხაროდ, ეს ჩუსტებიც გაქრა, სავარაუდოდ ჩუსტები რიგით სხვა გამვლელს მოეწონა და წაიღი.
ამ დროისთვის მიმდინარეობს ინტენსიური სამძებრო სამუშაოები. პროცესში ჩართულია სამაშველო ჯგუფი, პოლიცია და საგამოძიებო უწყებები. თუმცა, ხაზგასმით გვინდა აღვნიშნოთ, რომ ამ დრომდე დადასტურებით არ ვიცით, ნამდვილად მოხდა თუ არა ყველაზე მძიმე რამ – რადგან მამიდას კვალი უბრალოდ გაქრა.
ასევე, სრული პასუხისმგებლობით ვაცხადებთ, რომ გავრცელებული ინფორმაცია, თითქოს ემიგრაციიდან დაბრუნებულ მამიდას ოჯახი ცუდად ხომ არ შეხვდა, არის მტკნარი სიცრუე. მამიდას ჰყავს საოცარი შვილები, არაჩვეულებრივი მეუღლე და ოჯახი, რომელიც მას სიყვარულითა და სითბოთი ევლებოდა თავს.
მამიდას არასოდეს ჰქონია რაიმე წინაპირობა იმისა, რომ მსგავსი ნაბიჯი გადაედგა. იგი იყო გაწონასწორებული, თბილი, სიცოცხლით სავსე და მუდამ ღიმილიანი ქალი. ბედნიერი იყო შვილებით, შვილიშვილებითა და მთელი ოჯახით.
ჩვენ არ ვიცით, რატომ გავიდა გუშინ დილით სახლიდან მხოლოდ ჩუსტებით – ისე, რომ არ წაუღია არც ფული, არც ტელეფონი და არავისთვის არაფერი უთქვამს. არ ვიცით, რატომ დაგვატყდა თავს ეს უმძიმესი უბედურება…
გულითად მადლობას ვუხდით საგამოძიებო ჯგუფს, პოლიციას, მაშველებსა და თითოეულ ადამიანს, ვინც ამ დღეებში ჩვენს გვერდით დგას და მამიდას ძებნაში მონაწილეობს.
ასევე უსაზღვროდ მადლიერნი ვართ სრულიად საზოგადოების – თქვენი თანადგომა, ლოცვა და ინტერესი ჩვენთვის ძალიან ბევრს ნიშნავს. ბოდიშს გიხდით, რომ ფიზიკურად შეუძლებელია ათასობით შემოსულ შეტყობინებას სათითაოდ ვუპასუხოთ.
და მაინც… სადღაც გულის სიღრმეში გვინდა გვჯეროდეს, რომ მამიდა ამას საკუთარი ნებით არ ჩაიდენდა და იქნებ ცოცხალიც იყოს…
გთხოვთ, თავი შეიკავოთ დაუზუსტებელი ინფორმაციისა და ზედმეტი ინტერპრეტაციების გავრცელებისგან.
ჩვენ ჯერ კიდევ ველოდებით პასუხებს… და იმედი არ დაგვიკარგავს, რომ მამიდას აუცილებლად ვიპოვით. 😭-წერს ირაკლი ლომაია.
