19 წლის ფეხბურთლის, გიორგი შაქარაშვილის განზრახ მკვლელობაში ბრალდებული არასრულწლოვნის, ზ.ხ.-ს საცხოვრებელი სახლი ექსპერტ-კრიმინალისტებმა დატოვეს. ზ.ხ-ს მამის, თამაზ ხომასურიძის განმარტებით, ექსპერტ-კრიმინალისტებმა, მის სახლში ნაპოვნი სქემა დალუქეს და მას რამდენიმე სტანდარტული კითხვა დაუსვეს. ხომასურიძის განმარტებით, კითხვების ნაწილი ეხებოდა იმას, თუ როგორ აღმოაჩინა მან სახლში მოწყობილობა, რომელიც ხომასურიძის მტკიცებით, მოსასმენი აპარატურაა და ვინ გადასცა მას აღმოსაჩენი მოწყობილობა.
„კითხვები იყო სტანდარტული, თუ სად ვიპოვე და როგორ ვიპოვე, რის მიხედვით ვიპოვე, ვინ მომცა ეს აპარატურა, რითიც უნდა მეპოვა. ნაწილ კითხვას ვუპასუხე და ნაწილზე პასუხის გაცემისგან ადვოკატის გარეშე უარი ვუთხარი. რაც საჭირო იყო, ის ინფორმაცია მივაწოდე საკმარისზე მეტი. ორშაბათს მე და ჩემი ადვოკატი ცალკე გავივლით ამ თემას. არ ვუპასუხე იმას თუ ვინ გადმომცა აღმომჩენი მოწყობილობა, რადგან არ ვთვლი საჭიროდ ამ პიროვნების დასახელებას.
ეს არის სქემა, ზედ აქვს დამონტაჟებული პატარა მიკროფონი ან გადამცემი, მაგრამ ჩემი აზრით, ეს არის მიკროფონი, რადგან მიიღონ მათ ჩემი ნალაპარაკები“, – განაცხადა თამაზ ხომასურიძემ.
ხომასურიძის თქმით, მან სამართალდამცვლებს თვენახევრის წინ ვახტანგ ჩიქოვანის სახლში ნაპოვნი მსგავსი მოწყობილობის შესახებაც მიაწოდა ონფორმაცია.
ცნობისთვის, არასრულწლოვნის მამის განცხადებით, მან საძინებელ ოთახში სავარაუდოდ მოსასმენი აპარატურა აღმოაჩინა, რის შემდეგაც სამართალდამცავები გამოიძახა. თამაზ ხომასურიძე ვარაუდობს, რომ მოსასმენი აპარატურა მის საძინებელში, სახლის ჩხრეკის შემდეგ დატოვეს.
