ბოლო ორი კვირის განმავლობაში უკრაინის ომში დაღუპული რუსების რიცხვი რეკორდულად გაიზარდა – ამის შესახებ რუსული ოპოზიციური გამოცემები “მედიაზონა” და “ბი-ბი-სი-ს რუსული სამსახური” იტყობინება .
გამოცემები ღია წყაროებზე დაყრდნობით ცდილობენ დაადგინონ ომში დაღუპული რუსების ზუსტი რაოდენობა. ამჟამად მათ მოახერხეს 16 774 ადამიანის მონაცემების გარკვევა.
აღნიშნულია, რომ მიმდინარე წლის 24 თებერვლიდან 10 მარტამდე პერიოდში, ანუ ორ კვირაში, გარდაცვლილთა სიას 1638 სახელი შეემატა. ეს არის ახალი რეკორდი ორკვირიანი დანაკარგების სრულმასშტაბიანი ომის განმავლობაში. დაღუპულთა უმეტესობა “ვაგნერის” დაქირავებული სამხედროები არიან.
ჟურნალისტებმა ასევე გაარკვიეს, რომ ბოლო ორი კვირის განმავლობაში უკრაინაში 11 რუსი სამხედრო მაღალჩინოსანი დაიღუპა. მათ შორის არიან 126-ე სანაპირო თავდაცვის ბრიგადის არტილერიის მეთაური და რუსეთის ფედერაციის საგამოძიებო კომიტეტის თანამშრომელი.
სტატისტიკის ავტორები ხაზს უსვამენ, რომ მათ მიერ შეგროვებული მონაცემები არ ასახავს რუსული ჯარების დანაკარგების რეალურ მონაცემებს და ის გაცილებით მაღალია. სტატისტიკა მოიცავს მხოლოდ მათ, ვისი გარდაცვალების შესახებაც ცნობილი გახდა მედიის ნეკროლოგებიდან, ახლობლების შეტყობინებებიდან სოციალურ ქსელებში და სხვა ღია წყაროებიდან.
სტატისტიკაში არ შედის რუსეთის სარდლობის მიერ უგზო-უკვლოდ დაკარგულთა სიაში შეყვანილი პირები, თუმცა ეს მაჩვენებლებიც კი ბევრად აღემატება რუსეთის ფედერაციის თავდაცვის სამინისტროს ოფიციალურ მონაცემებს, რომელიც ამტკიცებს, რომ ომში მხოლოდ 7 ათასი სამხედრო დაკარგა.
უკრაინის გენერალური შტაბის ბოლო 24 საათის ოფიციალური მონაცემებით გასული წლის 24 თებერვლიდან, ამა წლის 11 მარტამდე პერიოდში, 158 000 რუსი სამხედროა დაღუპული.
