არტ-ბუნაგი – ასე ქვია სახელოვნებო სივრცეს ქუთაისში, რომელიც ქალაქის უძველეს ნაწილში მოეწყო.
ხელოვანებს, იდეების განხორციელების შესაძლებლობას მწერალი, პაპუნა გიორგაძე საკუთარ სახლში აძლევს.
გაპონოვის პირველი შესახვევი #29 – მისამართი, რომელიც ყოველკვირეულად შემოგთავაზებთ ახალ კულტურულ საღამოებს. აქ შეძლებთ გაეცნოთ მუსიკოსებს, პოეტებს, მწერლებს, მხატვრებს, ფოტოგრაფებსა და რა თქმა უნდა მათ შემოქმედებას.
როგორც პაპუნა გიორგაძე ამბობს, სივრცის შექმნის იდეა მულტფილმის ყურების დროს დაებადა და ეს მისთვის ხელოვნებაში დაბრუნების ერთგვარი შესაძლებლობაა:
,,სახლში ვიყავი, მულტფილმს ვუყურებდი და გადავწყვიტე რომ რაღაც მიმეცა საკუთარი თავისთვისაც, ხელოვნებაში დაბრუნების შანსი და ქალაქისთვისაც. ძალიან მნიშვნელოვანია მსგავსი სივრცის არსებობა, რადგან ვინმეს სადღაც მაინც უნდა ეგულებოდეს ადგილი, სადაც ესთეტიკური შიმშილის მოთხოვნილებას დაიკმაყოფილებს. სივრცის შექმნის მიზანი კი სწორედ ის არის რომ, ადამიანებმა მოძრაობა დაიწყონ და მოდერნ-არტს ეზიარონ.” – ამბობს პაპუნა გიორგაძე.
არტ-ბუნაგში უკვე ორი ღონისძიება გაიმართა. პირველი იყო ღონისძიება სახელწოდებით ,,მარტივად რომ ვთქვათ პოეზიის საღამო”, სადაც თავისი ლექსები წაიკითხეს პაპუნა გიორგაძემ, გიორგი ჯიმშელეიშვილმა და დათო ქარჩავამ.
მეორე კი იყო საბა საფარელის აკუსტიკური საღამო.
როგორც არტ-ბუნაგის შემქმნელი აცხადებს, სივრცეში მოხვედრა ნებისმიერ ხელოვანსა და ხელოვნებით დაინტერესებულ ადამიანს შეუძლია, ახალი ღონისძიებები კი აღდგომის კვირის შემდეგ არის ჩანიშნული.
