ათი წლის ბავშვი, რომელიც გორში ავარიის შედეგად დაშავდა, კატასტროფული მედიცინის ცენტრმა გორიდან თბილისში, იაშვილის ბავშვთა კლინიკაში გადმოიყვანა.
გორის მეათე საჯარო სკოლის მოსწავლე, სკოლიდან შინ ბრუნდებოდა, როდესაც მიკროავტობუსი დაეჯახა. ბავშვის ჯანმრთელობის მდგომარეობა მძიმეა.
„ავარიის ფაქტს სასწრაფო დახმარების ჯგუფი შემთხვევით შეესწრო. დაუყოვნებლივ მოხდა დაშავებული გოგონას გადმოყვანა ჩვენს კლინიკაში. სტაციონარში შემოყვანისას ბავშვი უგონო მდგომარეობაში იყო. მას აღენიშნება შუბლ-თხემ-საფეთქლის ძვლის მოტეხილობა. ბავშვი იმყოფება მართვით სუნთქვაზე და ის თბილისში, ბავშვთა სპეციალიზებულ კლინიკაში გადაიყვანეს. მისი მდგომარეობა მძიმეა. ამ დროისთვის პაციენტის სიცოცხლეს საფრთხე არ ემუქრება, თუმცა დაზიანების ხარისხი არ გამორიცხავს მდგომარეობის დამძიმებას”, – განუცხადა „ინტერპრესნიუსს” „გორმედის” რეანიმაციული სამსახურის ხელმძღვანელმა ტატო ქაჯაიამ.
