ქუთაისის თოჯინების სახელმწიფო თეატრის, როგორც დამოუკიდებელი იურიდიული სუბიექტის არსებობა მიმდინარე წლის აპრილში დასრულდა.
თეატრის ქონება და მართვის უფლება საქართველოს თოჯინების პროფესიულ სახელმწიფო თეატრების გაერთიანებას გადაეცა. გაერთინებას კი, რომელიც სამ თეატრს მოიცავს ერთი ხელმძღვანელი ყავს ნიკა საბაშვილის სახით
ამის მიზეზად სამინიტრო სამი თეატრის მენეჯმენტის გაუმჯობესებასა და შემოქმედებითი საქმიანობის ხარისხის ამაღლება სახელდება. თბილისში “ერთიან საამქროში” გადაწყდება სამივე თეატრის შემოქმედებითი მიმართულება.
ქუთაისის თოჯინების სახელმწიფო თეატრის ყოფილი სამხატვრო ხელმძღვანელი ია იაშვილი ამბობს, რომ ეს ქუთაისის თოჯინების თეატრისათვის უკან გადადგმული ნაბიჯია.
,,ქუთაისის თოჯინების სახელმწიფო თეატრი იყო ერთ-ერთი გამორჩეული და წარმატებული თავისი თვითმყოფადობითა და სამსახიობო ხელოვნებით. ჩემთვის წარმოუდგენელია გაერთიანების ერთი სამხატვრო ხელმძღვანელის პირობებში, თეატრებმა როგორ უნდა შეძლონ დამოუკიდებლობა, განვითარება და კონკურენციასთან გამკლავება. ეს ნიშნავს, რომ ქუთაისის თოჯინების თეატრი იურიდიულად არ არსებობს და ცალსახად შეიძლება ითქვას, რომ ეს გაერთიანება თოჯინების სახელმწიფო თეატრებისათვის უკან გადადგმული ნაბიჯია.“-განაცხადა ია იაშვილმა.
ქუთაისის იაკობ გოგებაშვილის სახელობის თოჯინების პროფესიული სახელმწიფო თეატრის სამხატვრო ხელმძღვანელი, რომლის მმართველობის შემდეგ თეატრმა იურიდიული სტატუსი დაკარგა, აღნიშნულ თემაზე კომენტარს არ აკეთებს და ამბობს, რომ იგი ზედიზედ ორჯერ არჩეული მმართველი იყო, რომელიც ვადის ამოწურვის შემდეგ თანამდებობიდან წავიდა.
,,ვერაფერს გეტყვით გარდა იმისა, რომ მე ვიყავი არჩეული ორჯერ და ვადის ამოწურვის შემდეგ დავტოვე თანამდებობა. “-განაცხადა ლევან გაბრიჭიძემ.
7 ოქტომბერს საქართველოს თოჯინების სახელმწიფო თეატრმა ქუთაისში ახალი სეზონი გახსნა. გახსნაზე მხოლოდ სასურველი მედიის წარმომადგენლები მიიწვიეს, რომელთა შორის არც ადგილობრივი დამოუკიდებელი მედია აღმოჩნდა.
აღსანიშნავია, რომ რეგიონების დეცენტრალიზაცია, მეტი ფინანსური, პოლიტიკური და ეკონომიკური დამოუკიდებლობა კვლავ დღის წესრიგში დგას, თუმცა ცენტრალიზაციის უსიტყვო მოწმენი ვხდებით.
არის კითხვები და ნაკლები პასუხები, საქართველოს თოჯინების პროფესიული სახელმწიფო თეატრების გაერთიანების შესახებ მეგა ტვ სიღრმისეულ რეპორტაჟს მოამზადებს, სადაც შევეცდებით გაერთიანების სარგებელსა და რისკებზე მოგითხროთ.
