კომპანია კასს ლენდი“ მოქალაქის ოთო დარბაისელის ფეისბუკ-პოსტის საპასუხოდ ვრცელ განმარტებას აქვეყნებს, რომელსაც უცვლელად გთავაზობთ.
„გვინდა გამოვეხმაუროთ „კასს ლენდის“ მიმართ გამოთქმულ პრეტენზიებს და გავაკეთოთ რამდენიმე განმარტება.
როგორც იცით, წალკის კანიონზე განხორციელდა ისრაელური კომპანია „კასს გრუპის“ კერძო ინვესტიცია და პროექტის ღირებულება 120 მილიონ ლარს აჭარბებს. პროექტის კომპლექსურობიდან და სირთულიდან გამომდინარე, მის დაპროექტებასა და მშენებლობაში ჩართული იყვნენ საერთაშორისო დონის წამყვანი სპეციალისტები და კომპანიები. სწორედ ამიტომ, „კასს ლენდის“ სრული ინფრასტრუქტურული მოწყობა წალკის კანიონზე არათუ აკმაყოფილებს საერთაშორისოდ აღიარებულ სტანდარტებს, არამედ თამამად შეგვიძლია ვთქვათ, რომ ხარისხის საერთოდ ახალ გაგებას გვთავაზობს. საქართველოს კანონმდებლობის გათვალისწინებით, საერთაშორისო ნორმების და რეგულაციების საფუძველზე, კიდევ ერთხელ ხაზგასმით აღვნიშნავთ, რომ ინფრასტრუქტურა სრულიად ადაპტირებულია შშმ პირებისთვის, რაც გულისხმობს შშმ-პირთათვის განკუთვნილი პანდუსების, ლიფტების (3 ლიფტი) და მანიშნებლების ინსტალაციას მთელ ტერიტორიაზე.
„კასს ლენდის“ ხედვაა შექმნას თანასწორი გარემო, რათა ყველა ადამიანს, თანაბრად შეეძლოს წალკის კანიონზე ჩამოსვლა და ყველა იმ ატრაქციით სარგებლობა, რომელსაც პროექტი მოიცავს. თუმცა, სოციალურ მედიაში გუშინ, 12 ივლისის შემდეგ გავრცელებული ინფორმაციის არასწორი ინტერპრეტაცია, აზიანებს კომპანიის რეპუტაციას და წინააღმდეგობაში მოდის არსებულ რეალობასთან.
რესტორანში ჩასასვლელი შშმ პირებისთვის განკუთვნილი ლიფტი, სამწუხაროდ მწყობრიდან იყო გამოსული, თუმცა ამ ტექნიკური ხარვეზის გამოსწორება 24 საათში მოხდა და ამ დროისთვის ლიფტი შეუფერხებლად მუშაობს. სამეთვალყურეო ვიდეო ფაქტებით შეგვიძლია დავადასტუროთ, რომ არასდროს, არცერთი შშმ პირისთვის დაშვება აკრძალული არ ყოფილა, ტერიტორიის იმ მონაკვეთებზე სადაც ნებადართულია გადაადგილება.
გახსნის დღიდან, 14 ივნისიდან დღევანდელი დღის ჩათვლით უკვე მრავალი შშმ პირი იმყოფებოდა „კასს ლენდში“, რომელთაც არანაირი პრობლემა არ შეჰქმნიათ ინფრასტრუქტურის სარგებლობისას.
აქვე აღვნიშნავთ, რომ ნებისმიერ მსურველს და დაინტერესებულ პირს შეგვიძლია შევთავაზოთ პერსონალური ტური და ადგილზე ვაჩვენოთ ის ადაპტირებული ინფრასტრუქტურა, რაზეც კომპანიის მხრიდან დიდი რესურსი დაიხარჯა.
გვინდა თხოვნით მივმართოთ საზოგადოებას და მედიას, რომ თავი შეიკავონ დაუდასტურებელი/გადაუმოწმებელი ინფორმაციის გაზიარებისგან. „კასს ლენდის“ გუნდი ყოველთვის მზადაა ღიად ისაუბროს აღნიშნულ საკითხთან დაკავშირებით და ამომწურავი პასუხი გასცეს ნებისმიერ კითხვას. არასწორი და არასრული ინფორმაციის გავრცელება, დიდი რისკის ქვეშ აყენებს იმ ტურისტული მიმართულების რეპუტაციას, რომელიც საქართველოს სავიზიტო ბარათი გახდა და მსოფლიო ყურადღების ცენტრშია.
„საქართველოს ბრილიანტის“ შესახებ საუბრობენ ისეთი ავტორიტეტული საერთაშორისო მედია ორგანიზაციები, როგორებიცაა CNN, BBC, Euronews და სხვა. დაუსაბუთებელი და გადაუმოწმებელი ინფორმაციის გავრცელება კი საფრთხეს უქმნის არა მხოლოდ „კასს ლენდს“ არამედ საქართველოს, როგორც ტურისტული მიმართულების ქვეყანას. ამ გიგანტური პროექტის უკან დგანან ადამიანები, რომლებიც ძალას და მონდომებას არ იშურებენ უკეთესი გარემოს შესაქმნელად, ყოველდღიურად კანიონი ათასობით ტურისტს მასპინძლობს, რაც კიდევ ერთხელ გვარწმუნებს იმაში, რომ „კასს ლენდით“ საქართველოს თითოეულ მოქალაქეს შეუძლია იამაყოს.
მადლობა ყველა იმ ადამიანს ვინც ამ თემით დაინტერესდა! ჩვენ გვჯერა, რომ ყველა ერთად შევძლებთ უკეთესი გარემოს შექმნას“, – ნათქვამია განცხადებაში.
