11 ივლისს, დილით 07.36 საათიდან 12:00 საათამდე საქართველოში, სოფელ სამებასთან მიწისძვრა 6 ჯერ მოხდა. ახალი ამბების სააგენტო Pia.ge-სთან სეისმოლოგი თეა გოდოლაძე განმარტავს თუ სად არის ზუსტად მიწისძვრის ეპიცენტრი, სომხეთი თუ საქართველო… რამდენად საფრთხის შემცველია დღის მანძილზე ინტენსიური მიწისქვეშა ბიძგები და რა უნდა ქნან მოქალაქეებმა თუ კი მიწისძვრის ეპიცენტრში აღმოჩნდებიან.
ქალბატონო თეა, დილიდან მოყოლებული 6 ჯერ იყო მიწისქვეშა ბიძგები. სომხური მედია წერს, რომ ეპიცენტრი სომხეთში იყო, ქართული მედია წერს, რომ სოფელ სამებასთან იყო. სად იყო რეალურად მიწისძვრის ეპიცენტრი?
– სასაზღვრო ზოლია, შესაბამისად როცა ესაზღვრები 2 კილომეტრი აქით-იქით არის ცდომილების ფარგლები. ასე რომ ჩვენი ეპიცენტრი უფრო სწორია. სომხეთსაც შეუძლია დაწეროს, რომ მათთან არის მიწისძვრა. სწორედ ამ სასაზღვრო ზოლში ხდება მიწისძვრები.
რამდენად საშიში და საფრთხის შემცვლელია მიწისძვრები ასეთი ინტენსივობით?
– არანაირად, პირიქით უკეთესია.
რატომ არის უკეთესი, განვუმარტოთ მკითხველს…
– ახლა წარმოიდგინეთ… რა ხდება მიწისძვრის დროს? ენერგია თავისუფლდება, ხომ? დაძაბულობის გამოთავისუფლება რას ნიშნავს? ენერგია გამოიყოფა. ეს ენერგია ერთბაშად რომ გამოიყოს, ასეთ შემთხვევაში უფრო დიდი მიწისძვრა მოხდება, რაც გაცილებით უფრო დამანგრეველი და საშიშია, ვიდრე საშუალო სისუსტის მიწისძვრა.
ამიტომ, ძალიან კარგია, რომ ეს ენერგია ჯავახეთზე თავისუფლდება პორცია-პორციად. შესაბამისად, ჯავახეთი სულ ასე იქნებოდა 5 მილიონი წლის წინ, ასე არის ახლა და ასე იქნება მომავალში. პროგნოზირება რთულია თუ როდის შეიცვლება ჯავახეთის ტექტონიკური მოდელი.
პირველი წესი, რაც მიწისძვრის უნდა გააკეთონ მოქალაქეებმა…
– თუ ეპიცენტრში არ ხართ, არც არაფერი, მშვიდად უნდა იყოთ. თუ ეპიცენტრში ხართ, კარგ სახლში უნდა იცხოვროთ და არ უნდა იცხოვროთ ისეთ სახლებში, მაგალითად როგორიც თბილისშია.
ახალაშენებულ საცხოვრებელ სახლებს გულისხმობთ ?
– ახალაშენებულსაც, ძველსაც… ყველა სახლს ამორტიზაცია გააჩნია, ამიტომ ეს ისეთი ქალაქი და ქვეყანაა, რომ ინფრასტრუქტურული პროექტები უნდა იყოს გამართული. სეისმომედეგობას რასაც ვეძახით, მუდმივად უნდა მოწმდებოდეს. იმიტომ რომ ყველა სახლს აქვს ექსპლუატაციის პერიოდი. ექსპლუატაციის პერიოდის გასვლის შემდეგ ხდება ცვეთის პერიოდი, კონსტრუქცია იცვითება. არ შეიძლება ასეთ ქვეყანაში ცუდი სახლები შენდებოდეს. ფურცელზე ყველაფერი „მოწმდება“. „მოწმდება“ საბჭოთა მეთოდებით და ვიხდით ამაში ფულს.
წყარო:pia.ge
