Tesla-ს დამფუძნებელმა, ილონ მასკმა Lex Friedman-თან ინტერვიუში განაცხადა, რომ მისი კომპანია SpaceX მარსზე ადამიანებს 5-10 წელიწადში გაგზავნის. ამის შესახებ ინფორმაციას გამოცემა Gizchina ავრცელებს.
გამოცემის ცნობით მარსის სწრაფი კოლონიზაციის გეგმა გაუქმებულია. ილონ მასკი დარწმუნებული აღარ არის, რომ ხალხის წითელ პლანეტაზე გადაყვანას ხუთ წელიწადში დაასრულებს. მანამდე იგი გეგმავდა, რომ მარსის კოლონიზაცია მაქსიმუმ ხუთ წელიწადში დაესრულებინა.
„საუკეთესო შემთხვევაში მარსზე პირველ ჩასვლას, დაახლოებით ხუთი წელი დასჭირდება, უარეს შემთხვევაში – ათი წელი“, – აცხადებს იგი. ამასთან, მასკი მარსის კოლონიზაციაზე არ საუბრობს და უბრალოდ დაჯდომას ან კვლევით მისიას გულისხმობს.
მან განმარტა, რომ ამ საკითხში ყველაზე მნიშვნელოვანი სარაკეტო ტექნოლოგიაა.
„ჩვენ ვქმნით სრულიად ახალ რაკეტას. ვგულისხმობ Starship-ს – ეს არის ყველაზე დახვეწილი რაკეტა, რაც კი ოდესმე შექმნილა“, – აცხადებს იგი.
SpaceX რეგულარულად გზავნის ასტრონავტებს საერთაშორისო კოსმოსურ სადგურზე, Starship-მა კი NASA-სთან უკვე გააფორმა მომგებიანი შეთანხმება, რომელიც სააგენტოს ასტრონავტების მთვარეზე აყვანას მოიაზრებს.
