“ქართული ოცნების” ლიდერები ,,ევროპის სახალხო პარტიის” ყრილობაზე გაჟღერებულ განცხადებას ქართული მართლმსაჯულების შეურაცხყოფად აფასებენ და ამტკიცებენ, რომ ეს ჟესტი “ნაციონალური მოძრაობის” ანტიევროპული კამპანიის ნაწილი იყო.
სოზარ სუბარის თქმით, “მიხეილ სააკაშვილისთვის განკუთვნილ სკამს დიდხანს მოუწევს ცარიელ მდგომარეობაში ყოფნა”. „ქართული ოცნების“ ლიდერი მიხეილ სააკაშვილს უბოროტეს დამნაშავედ მოიხსენიებს.
ცარიელი სკამი დარჩება ცარიელ სკამად, დაახატონ თუ დააწერონ, რაც უნდათ, ის ქნან. ოღონდ დიდხანს მოუწევს ამ სკამს ცარიელად ყოფნა. მიხეილ სააკაშვილის ადგილი არის იქ, სადაც მას მიუსაჯა სამართლიანმა სასამართლომ ადგილი. თუ ვინმეს ეჭვი ეპარება ამისვთის არსებობს სტრასბურგის სასამართლო.
სააკაშვილი არ არის ჩვეულებრივი პატიმარი, სააკაშვილი არის უბოროტესი დამნაშავე, რაც კი ქართულ ციხეებში ვინმე არის – აცხადებს სოზარ სუბარი ,,პირველებთან” საუბრისას.
შეგახსენებთ, რომ ,,ევროპის სახალხო პარტიის” ყრილობაზე მიხეილ სააკაშვილისთვის განკუთვნილი სკამი ცარიელი იყო. დონალდ ტუსკმა საუბარი სწორედ პატიმრობაში მყოფი პრეზიდენტის შესახებ დაიწყო და მიხეილ სააკაშვილის წერილიც წაიკითხა.
“ევროპის სახალხო პარტია” საქართველოში მიმდინარე პროცესებით შეშფოთებულია – EPP პირდაპირ ამბობს, რომ ბოლო წლებში საქართველოში დემოკრატიული პროცესები შეფერხდა.
