ქუთაისში აფხაზეთიდან დევნილი 27 265 და ცხინვალიდან დევნილი 366 ადამიანი ცხოვრობს – ამის შესახებ საქართველოს 2019 წლის მიგრაციის პროფილშია აღნიშნული, რომელიც მიგრაციის საკითხთა სამთავრობო კომისიის ფარგლებში შემუშავდა.
ცხინვალის რეგიონიდან იძულებით გადაადგილებულ პირთა დიდი ნაწილი მცხეთა-მთიანეთსა 10 074 ადამიანი და შიდა ქართლში 9 459 ადამიანი ცხოვრობს, ხოლო აფხაზეთიდან დევნილთა უმრავლესობა 107 526 ადამიანი თბილისში და 89 237 დევნილი სამეგრელო-ზემო სვანეთშია განსახლებული.
ცხინვალის რეგიონიდან იძულებით გადაადგილებული მოსახლეობის დიდი ნაწილი კომპაქტურ დასახლებებში ცხოვრობს, ხოლო აფხაზეთიდან იძულებით გადაადგილებულ პირთა უმრავლესობა – კერძოში.
საქართველოში მცხოვრები იძულებით გადაადგილებული პირები (დევნილები) ორი ძირითადი ჯგუფისგან შედგება:
იძულებით გადაადგილებულ პირთა პირველი ტალღა, რომლებმაც 1991-1993 წლებში თავიანთი ნების საწინააღმდეგოდ დატოვეს აფხაზეთის და ცხინვალის რეგიონის/სამხრეთ ოსეთის ოკუპირებული ტერიტორიები და
იძულებით გადაადგილებულ პირთა მეორე ტალღა, რომლებმაც 2008 წლის რუსეთ-საქართველოს ომის შედეგად დატოვეს იგივე რეგიონები.
აფხაზეთიდან იძულებით გადაადგილებულ პირთა რაოდენობა თითქმის 10-ჯერ აღემატება ცხინვალის რეგიონიდან იძულებით გადაადგილებულ პირთა რაოდენობას.
