აქცია ბაღდათში – ქუჩაში გამოსული ბაღდათის რაიონის 4 სოფლის მოსახლეობა პროკურატურას უკანონო გადაწყვეტილების მიღებაში ადანაშაულებს და ამბობს, რომ საგამოძიებო უწყებამ ბრალი მიწების თაღლითური გზით რეგისტრაციის საქმეზე რამდენიმე ადგილობრივს უკანონოდ წარუდგინა.
აქციიის მონაწილეები მათ გათავისუფლებასა (ბაღდათის მერის წარმომადგენელი ნერგეთის თემში და მისი თანაშემწე-ნუგზარ კბილაშვილი, ბესო კბილაშვილი ) და სისხლის სამართლებრივი დევნის შეწყვეტას ითხოვენ. ადგილობრივები დაკავებებს გავლენიანი ბიზნესმენის გამო დაწყებულ სისხლის სამართლის საქმეს უწოდებენ. ისინი აცხადებენ, რომ სამართალდამცავმა უწყებამ გამოძიება მიკერძოებით დაიწყო.
ადგილობრივები აცხადებენ, რომ კურორტ საირმეს მიმდებარე ტერიტორიებზე არსებული მიწის ნაკვეთები მათი წინაპრების საკუთრება იყო და აღნიშნული ტერიტორიები მათ კანონის სრული დაცვით დაირეგისტრირეს.
ჩვენი აქციის მიზანია, რომ ყველას მივაწვდინოთ ხმა ამ გაუგონარი უსამართლობის წინააღმდეგ. ასეთი უსამართლობის პირობებში ჩუმად ყოფნა არის ამ დანაშაულში ირიბი თანამონაწილეობა და ჩაგვრა კეთილსინდისიერი მოქალაქეების.
ეს ხალხი არის უდანაშაულო, არავითარი თაღლითობა მათი მხრიდან არ მომხდარა. – აცხადებენ აქციის მონაწილეები.
ვერ ადასტურებენ, თუმცა ბრალდებულების ერთ ნაწილს ეჭვი აქვს, რომ მათ პროკურატურა ამ გზით სარფიანი მიწების დათმობას აიძულებს, რომლითაც შესაძლოა კურორტი „საირმეს“ მფლობელი იყოს დაინტერესებული.
პროკურატურის ოფიციალური ვერსიით, ბრალდებულებმა ყალბი დოკუმენტი მოამზადა და მას საჯარო რეესტრი დაეყრდნო. სადავო მიწის ნაკვეთები, პროკურატურის მტკიცებით, სინამდვილეში სატყეო ფონდს ეკუთვნის
ბრალის დადასტურების შემთხვევაში, ბრალდებულებს 6-დან 9 წლამდე თავისუფლების აღკვეთა ელით.
