უკრაინის უმაღლესი რადას თავმჯდომარე რუსლან სტეფანჩუკი საქართველოს პარლამენტის თავმჯდომარის, შალვა პაპუაშვილის მიერ ბუჩასა და ირპენის მონახულებაზე უარს გამოეხმაურა. ამის შესახებ, რუსლან სტეფანჩუკმა Facebook-ის საკუთარ გვერდზე განაცხადა.
“ხამს მოყვარე მოყვრისათვის თავი ჭირსა არ დამრიდად, გული მისცეს გულისათვის, სიყვარული – გზად და ხიდად” – უკრაინის რადის თავმჯდომარემ, რუსლან სტეფანჩუკმა საქართველოს პარლამენტის თავმჯდომარეს, შალვა პაპუაშვილს შოთა რუსთაველის აფორიზმით უპასუხა.
“შეუსაბამო. ასე დაახასიათა საქართველოს პარლამენტის თავმჯდომარემ, შალვა პაპუაშვილმა ჩემი მოწვევა ბუჩასა და ირპენის მოსანახულებლად. იგი შეუძლებლად თვლის უკრაინაში წასვლას, სანამ “უკრაინის ხელისუფლების ზოგიერთი წარმომადგენელი სრულად არ გააცნობიერებს იმ ძლიერ მხარდაჭერას, რომელსაც საქართველო გვაძლევს”. – განაცხადა სტეფანჩუკმა. მან დასძინა, რომ ასეთი ძლიერი მხარდაჭერის მაგალითად, ქართველმა სპიკერმა მოიყვანა საქართველოს ხმა უკრაინის სასარგებლოდ საერთაშორისო პლატფორმებზე, როგორიცაა გაერო.
“კოლეგა, უკრაინა აფასებს ნებისმიერ დახმარებას, რომელსაც სხვა ქვეყნებისგან იღებს ამ რთულ დროს. ჩვენ ყოველდღე ვითხოვთ სანქციების გაზრდას, სამხედრო, პოლიტიკურ და ფინანსურ მხარდაჭერას. არის ქვეყნები, რომლებიც გვეხმარებიან ყველა სფეროში. არის ქვეყნები, რომლებიც მხოლოდ ცალკეულ საკითხებში გვეხმარებიან.” – აღნიშნა უმაღლესი რადას თავმჯდომარემ.
სტეფანჩუკმა დასძინა, რომ უკრაინა აფასებს და ყოველთვის დააფასებს მოძმე ქართველი ხალხის გულწრფელ მხარდაჭერას.
„ჩვენ ვიცით, რომ ქართველები ყოველთვის გულწრფელი, გამბედავი და მამაცი მეომრები არიან, რომელთაგან ბევრი დღეს გვერდში დგას ჩვენს დამცველებთან და იცავს უკრაინას რუსული შემოჭრისგან.
ისევე, როგორც ბევრი უკრაინელი 2008 წელს იდგა ქართველების გვერდით იმავე რუსეთის წინააღმდეგ, რომელიც ხელყოფდა მის დამოუკიდებლობას, რომელმაც გადაყლაპა მისი ტერიტორიის ნაწილი, დახოცა მისი ხალხი“. – იხსენებს სპიკერი.
მან დასძინა, რომ უკრაინა მაშინ, საქართველოს რუსეთთან დაპირისპირების პირველივე დღიდან მხარს უჭერდა საქართველოს: როგორც პოლიტიკურ, ასევე საინფორმაციო, საერთაშორისო და სამხედრო დონეზე. სტეფანჩუკმა ასევე გაიხსენა, რომ უკრაინული საზენიტო თავდაცვის სისტემების (ბუკი და ოსა) წყალობით, ქართველებმა ცა დაიცვეს.
“მაგრამ ჩვენ არ ვზომავთ მხარდაჭერის ოდენობით. მხარდაჭერა ყოველთვის გულწრფელი უნდა იყოს. და ყველა, ვინც ასეთ მხარდაჭერას უწევს, მოქმედებს ისე, როგორც მას საშუალებას აძლევს გარემოებები, სინდისი და მოვალეობის გრძნობა. საბოლოო ჯამში, ჩვენ, პოლიტიკისებს, ყოველთვის ჩვენი ხალხები და ისტორია შეგვაფასებს.
ერთადერთი, რაც მაძლევს აუხსნელი მღელვარების განცდას, არის კითხვა: მიზანშეწონილია თუ არა „უადგილო“ უწოდო მოწვევას მეგობარ ქვეყანაში და შეხედო მის უბედურებას, გაიზიარო მწუხარება, გამოთქვა მხარდაჭერის სიტყვები? მეჩვენება, რომ მეგობარმა ეს უნდა გააკეთოს მოსაწვევების გარეშე“. – განაცხადა სტეფანჩუკმა.
