ცნობილი უკრაინელი ფეხბურთელი ოლეკსი მიხაილიჩენკო მის ქვეყანაში მიმდინარე ომს გამოეხმაურა და ოკუპანტი ქვეყნის არმიას “ბარბაროსები” უწოდა. 58 წლის ვეტერანი ოჯახთან ერთად კიევის მახლობლად რჩება და ქვეყნის თავისუფლებისთვის ბოლომდე ბრძოლას აპირებს.
ოლეკსი მიხაილიჩენკო: “ომით გამოწვეული შოკისგან ჯერაც არ გამოვსულვართ. თავდასხმის პირველი საათები ახლაც კარგად მახსოვს. ვერაფრით დამეჯერებინა, რომ შეიძლებოდა, ასეთი რამ მომხდარიყო, თუმცა, მეზობლად ისეთი ბარბაროსები გვყავს, ყველაფრისთვის მზად უნდა ვყოფილიყავით.
თავს დიდი გამოცდა დაგვატყდა, თუმცა, დარწმუნებული ვარ, მას გადავლახავთ. ისეთი ერთიანობა, ისეთი სიყვარული, როგორიც ახლა უკრაინაშია, არასდროს მინახავს. ვამაყობ ჩვენი არმიითა და ხალხით. უკრაინა დიდი ერია.
მიმდინარე მოვლენებს ყველანი გაფაციცებით ვუყურებთ. ტელევიზორი სულ ჩართულია, 24/7-ზე ახალი ამბებია. ფეხბურთმაც კი მე-2 პლანზე გადაიწია.
ბოლო 3 კვირაა მხოლოდ რეალი-პსჟ ვნახე, ისიც იმიტომ, რომ ფსიქოლოგიურად ცოტა ამომესუნთქა. მანამდე, ვერც კი გამეგო, კალენდარში რა დღე იყო. მხოლოდ სტრესი და განცდები. ახლა, მთელი გულით მარიუპოლში ვარ, რომელიც რუსულ არმიას ალყაში ჰყავს. უფრო სწორად, ეს არმია კი არა, ურდოა, რუსული ურდო”.
ცნობისთვის, 58 წლის მიხაილიჩენკოს კარიერის უმეტესი დრო დინამო კიევში აქვს გატარებული, უცხოეთში კი იტალიურ სამპდორიასა და შოტლანდიურ რეინჯერსში უთამაშია. ოლეკსის 36 მატჩი აქვს ჩატარებული საბჭოთა კავშირის ნაკრებში და ოლიმპიური ოქროს (1988) მფლობელიცაა, უკრაინის ეროვნული გუნდის მაისურით კი 2 მატჩის გამართვა მოასწრო. ის ერთი წელი (2008-09) ნაკრების მთავარი მწვრთნელიც იყო, 2019-20 წლებში კი დინამო კიევს ავარჯიშებდა.
