საქართველოს მართლმადიდებელი ეკლესიის, ბელგიისა და ჰოლანდიის ეპარქიის კომუნიკე
ბრიუსელი – 2022 წლის 5 მარტი.
სასულიერო პირებმა იმსჯელეს გასული 2021 წლის ეპარქიის მიერ გაწეული საქმიანობის, სამრევლოების, ღვთისმსახურებისა და საეპარქიო კომისიების მუშაობის შესახებ.
განსაკუთრებული ყურადღება დაუთმეს, აღმოსავლეთ ევროპაში, რუსეთის ფედერაციის მიერ უკრაინაზე თავდასხმას და იქ განვითარებულ ტრაგიკულ მოვლენებს, ჰუმანიტარულ აქციებში ეპარქიის სამრევლოების მონაწილეობას.
ბელგიისა და ჰოლანდიის ეპარქია, მისი სამღვდელოება და მრევლი დიდ მწუხარებას გამოხატავს მომხდარის გამო და ბუნებრივია უერთდება ცივილიზირებული სამყაროს ხედვას არსებული პრობლემის მიმართ.
გვაოცებს თქვენი გმირობა, თავისუფლებისათვის თავგანწირვა. სამაგალითოა თქვენი დიდსულოვანი დამოკიდებულება ტყვედ ჩავარდნილი რუსი ჯარისკაცებისადმი, რითაც თქვენ, უკიდურესად რთულ წუთებშიც კი სახარებისეული მოწოდების ერთგულნი რჩებით.
2008 წელს რუსეთის მხრიდან, საქართველოს ტერიტორიის ნაწილის ანექსიით, მსოფლიო მოწმე გახდა ნეობოლშევიკური, საბჭოთა იდეის რეკონსტრუქციის მცდლობისა. სადაც თავისუფლებას იმდენი ფასი ქონდა, რამდენიც ტყვიას, რომლითაც თავისუფლებისთვის მებრძოლის სიცოცხლე წყდებოდა. დღეს უკრაინაც იხდის თავისუფლებისთვის ფასს. ვინ გადაიხდის ხვალ?!
ჩვენთვის ცნობილია ბოროტება, რომელიც იმალება ეროვნული და ზოგჯერ რელიგიური ინტერესების საფარქვეშ. ვფიქრობთ ეს ახლა მთელი დასავლეთისათვის გახდა ნათელი. 2008 წელს, ჩვენი მორწმუნეების უმრავლესობამ თავის თავზე გამოსცადა ომის დაუნდობლობა, ნგრევა და სისასტიკე. ლტოვილობა და დეპრესია დღემდე მოუშუშებელ იარად რჩება.
სოლიდარობას ვუცხადებთ ყოველ მორწმუნეს უკრაინაში, რომელ იურისდიქციაშიც არ უნდა იმყოფებოდეს ის, განსაკუთრებით უკრაინის ავტოკეფალურ მართლმადიდებლურ ეკლესიას. საქართველმ და მისმა ეკლესიამ იმთავითვე დიდი მხარდაჭერა გამოხატა ჩვენი მოძმე უკრაინელი ხალხის მიმართ, მაგრამ ეკლესიოლოგიური თვალსაზრისით კი უფრო მნიშვნელოვანი იქნებოდა ხსენებული ეკლესიის ავტოკეფალიის აღიარების შესახებაც დაგვეწყო ფიქრი.
ჩვენ ვლოცულობთ და ევქარისტიულ საიდუმლოში უფალს ვავედრებთ ყოველ თქვეგანს და გარდაცვლილთა სულებს. თქვენთან ერთად გვჯერა, რომ ღვთივბოძებულ თავისუფლებას და მშვიდობას ალტერნატივა არ აქვს. ომი უნდა შეწყდეს. შურისძიება უნდა დაცხრეს. თავისუფლების სიყვარულმა უნდა გაიმარჯვოს!
