WBA-ის, WBO-სა და IBF-ის საჩემპიონო ქამრების მფლობელმა, ოლექსანდრ უსიკმა რუს ხალხს მიმართა. უკრაინელი მოკრივე სამშობლოს დასაცავად საბრძოლველად მზადაა და რუსებს მოუწოდებს, თვალები გაახილონ და ხმა ამოიღონ.
„რუსებო, თქვენ მოგმართავთ. თქვენ მზად ხართ, ტელევიზორისა და მოსყიდული ადამიანების მიერ სოციალურ ქსელებში დაწერილი კომენტარების გჯეროდეთ, მაგრამ არ ხართ მზად, სასტიკი და აშკარა სიმართლე მიიღოთ.
ჩვენ უმიზეზოდ გვხოცავენ. ამას მხოლოდ იმიტომ აკეთებენ, რომ გვსურს, დამოუკიდებლად ვიცხოვროთ და გადაწყვეტილებები დამოუკიდებლად მივიღოთ.
უკრაინაში არავის კლავენ და ჩაგრავენ არასწორი განცხადებების გამო. ჩვენთან ხელისუფლებაში ნაცისტები არ არიან. არანაირი სპეცოპერაცია არ არსებობს!
თქვენმა მთავრობამ ისეთი ომი მოაწყო, როგორიც აქამდე მხოლოდ ფილმებში გვქონდა ნანახი. თუ ჩვენი არ გესმით და არ გჯერათ, ნახეთ, თქვენი თანამემამულეები რას ამბობენ. თანამემამულეები, რომლებმაც გაანალიზეს, რა ხდება და მიხვდნენ, რომ მთავრობამ ისინი მოატყუა.
ერთი წამით წარმოიდგინეთ, რომ ისინი სიმართლეს ამბობენ… შეეცადეთ, წარმოიდგინოთ, ასეთ ვითარებაში ჩვენ რას ვგრძნობთ. სარდაფებში ვსხედვართ, რაკეტები საცხოვრებელ სახლებს ანადგურებენ და სკოლები და საავადმყოფოები იწვის. ბავშვები იღუპებიან!
თვალები გაახილეთ! ის, რასაც სიყალბეს უწოდებთ, რეალობაა. შეუძლებელია, მთელი მსოფლიო იტყუებოდეს. ჩუმად ნუ იქნებით! სიმართლე თქვით. აქციაზე წასვლა ისეთი საშიში არაა, როგორც არტილერიის ხმების გაგონება.“
შეგახსენებთ, რომ რუსეთმა უკრაინაზე სრულმასშტაბიანი თავდასხმა 24 თებერვალს გამთენიისას, ერთდროულად რამდენიმე დიდი ქალაქის, მათ შორის კიევის დაბომბვით დაიწყო.
