ხუთი კომიტეტის გაერთიანებულ სხდომაზე ხმაური იყო. პარლამენტში ერთმანეთს ანრი ოხანაშვილი და ტელეკომპანია „პირველის“ დირექტორი, ვატო წერეთელი დაუპირისპირდნენ.
იურიდიულ საკითხთა კომიტეტის თავმჯდომარემ წერეთელი სხდომათა დარბაზიდან გააძევა.
მიზეზი აზარტულ თამაშებთან დაკავშირებით კანონმდებლობის გამკაცრების საკითხი გახდა.
“TV პირველის” დამფუძნებელმა და გენერალურმა დირექტორმა ვახტანგ წერეთელმა, ანრი ოხანაშვილს ჰკითხა, უთამაშია თუ არა და რომელი ურჩევნია “კრისტალბეთი” თუ “აჭარაბეთი”?
ამასთან, წერეთელმა აზარტული თამაშების რეკლამირების აკრძალვის შესახებ პრემიერ-მინისტრის ინიციტივა გააკრიტიკა და თქვა, რომ აღნიშნული კანონპროექტი, განსაკუთრებით კი მისი დაჩქარებული განხილვა მედიისთვის დარტყმაა.
მან ასევე ირაკლი ღარიბაშვლს მავნე უწოდა. რის საპასუხოდაც პარლამენტის იურიდიულ საკითხთა კომიტეტის თავმჯდომარე ანრი ოხანაშვილმა ვახტანგ წერეთელს “უზრდელი” უწოდა და დარბაზი დაატოვებინა.
“ბიზნესის წარმომადგენლები ამბობენ, რომ ეს გადაწყვეტილება მნიშვნელოვნად შეამცირებს ქართული სპორტის დაფინანსებას.
ეს არის პირდაპირ გაწირვა ჩვენი ახალგაზრდა სპორტსმენების ნარკომანიის და კრიმინალისთვის.
გარდა ამისა, ეს არაფერია სხვა თუ არა მედიის ჩაწიხვლა, იმიტომ, რომ იცით, რომ მედია მხოლოდ რეკლამებით ცხოვრობს, რატომ უნდა იხილებოდეს ასეთი ფორსირებული წესით ეს კანონპროექტი?
ღარიბაშვილი არის მავნე ადამიანი, რომელიც რასაც ეხება, პირდაპირ წალეკავს, რასაც შეეხო ეკონომიკა, ჯანდაცვა, რასაც შეეხო ყველაფერი დააჩოქა და დააჩმორა ამ ქვეყანაში.
ეს მხოლოდ ტელევიზიების ჩაწიხვლის მეთოდებია, რომ კრიტიკული მედია ჩაწიხლონ, რომმას არ ჰქონდეს შემოსავალი”, – თქვა ტვ პირველის დირექტორმა.
“ბატონო ვატო, თქვენ ხართ უზრდელი ადამიანი და მავნე, გადით აქედან და გაიარეთ”- უპასუხა ვატო წერეთელს ანრი ოხანაშვილმა.
