გაიმართა რუმინეთის მართლმადიდებელი ეკლესიის წმიდა სინოდის საშემოდგომო სხდომა.
წმიდა სინოდმა იმსჯელა იმ რთულ ეკონომიკურ მდგომარეობასა და კოვიდვითარებაზე, რომელიც რუმინეთის სახელმწიფოში მძვინვარებს.
უნეტარესი სრულიად რუმინეთის პატრიარქი დანიელი და რუმინეთის საპატრიარქოს წმნდა სინოდის სრული შემადგენლობა შეჯერდა გადაწყვეტილებაზე, რომ გამოიყოს კომისია. რომელიც ქრისტეს შობის მთელი მარხვის განმავლობაში იზრუნებს უპოვართა დაპურებისათვის.
უნეტარეს პატრიარქ დანიელის თქმით, ფუჭია ყოველი მარხვა თუ გვერდით მყოფი ადამიანი შიმშილით კვდება, ამიტომ ეკლესია იზრუნებს განსაკუთრებით გაჭირვებულებზე, რათა მათი შობაც ბედნიერი იყოს.
“ჩვენ გავდივართ უკიდურესად რთულ პერიოდს ჯანმრთელობისა და სიცოცხლის დაცვის თვალსაზრისით, როდესაც ბევრ ადამიანს სცდის ახალი ეპიდემია, რომელიც მთელ მსოფლიოში გავრცელდა. ამ პერიოდში ჩვენ ძალიან გვჭირდება ლოცვა და ძმური თანადგომა, ძალიან გვჭირდება ღმერთთან დაახლოება და პრაქტიკული სოლიდარობის გამოვლენა სხვა ადამიანებთან.
ჩვენი სულისა და სხეულის მომზადება და განწმენდა არ ხდება მხოლოდ წმიდა აღსარებისა და წმიდა ევქარისტიის მეშვეობით, არამედ ქველმოქმედებითაც! ამიტომ, მოვუწოდებთ ჩვენი წმიდა ეკლესიის სასულიერო პირებს და საერო პირებს, შეაგროვონ საკვები, ტანსაცმელი და წამლები სამრევლოების, მონასტრების, დეკანოზებისა და საეპარქიო ცენტრების მეშვეობით და მთელი შობის მარხვის განმავლობაში დავანაყროთ ყველა მშიერი”, – ვკითხულობთ რუმინეთის ეკლესიის წმიდა სინოდის განჩინებაში.
