რამდენიმე ქვეყანაში მიმდინარეობს სივრცეებში მწვანე პასპორტებით დაშვების მექანიზმი. ჩვენთან ამაზე მუშაობა მთავრდება და ოქტომბერში კიდევ მრავალი მექანიზმი ამუშავდება, რომ დეკემბრის ბოლოსთვის ავიდეთ 60%-იან აცრის მოცვაზე, – ამის შესახებ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ განაცხადა.
მისივე ინფორმაციით, ბოლო დღეებში ვაქცინაციის ტემპი შემცირდა. როგორც გამყრელიძემ განაცხადა, ჯანდაცვის სამინისტროსთან ერთად მიმდინარეობს ვაქცინაციის ტემპის გაზრდის სტრატეგიაზე მუშაობა.
,,დღევანდელი მონაცემებით, მოზრდილი მოსახლეობის 27.9%-ია ორჯერადად აცრილი. ჩვენ აგვისტოში საკმაოდ კარგი ტემპი გვქონდა და 23 000 აცრა ტარდებოდა დღიურად, ამასთან 16 სექტემბრამდე 24 000 აცრა გვქონდა.
ბოლო ერთი კვირის საშუალო მონაცემი დავარდნილია 12 500-მდე, რაც არ არის კარგი და საჭიროა ტემპის აქსელერაცია. სამინისტროსთან ერთად მიმდინარეობს მუშაობა მომავალი 90 დღის დაგეგმვაზე, თუ როგორ უნდა გავაძლიეროთ ვაქცინაციის ტემპი.
ერთ-ერთი მთავარი პირველადი ჯანდაცვის ფართოდ ჩართვა და მათი მეტად წახალისება იქნება. ამცრელი ბრიგადებით აქტიურად უნდა მივიდეთ მოსახლეობასთან და ადგილზე, ყველა სოფელსა თუ დაბაში ჩავატაროთ როგორც კამპანია, ასევე აცრები.
გარდა მასობრივი საინფორმაციო კამპანიისა არ გამოვრიცხავთ არაპირდაპირი მანდატორიზმის მექანიზმების შემოტანასაც. სკოლები უნდა იყოს სრულად 80.90%-ით აცრილი, ყველა სკოლის დირექტორი მოუწოდებს მშობლებს, რომ იყვნენ აცრილები.
ასევე, რამდენიმე ქვეყანაში მიმდინარეობს სივრცეებში მწვანე პასპორტებით დაშვების მექანიზმები. ჩვენთან ამაზე მუშაობა მთავრდება და ოქტომბერში კიდევ მრავალი მექანიზმი ამუშავდება, რომ დეკემბრის ბოლოსთვის ავიდეთ 60%-იან მოცვაზე“, – აღნიშნა ამირან გამყრელიძემ.
