“ერის” ლიდერი მორიგ ვიდეომიმართვას ამჯერად სტამბოლიდან ავრცელებს, სადაც ის გამოკვლევებზეა და პრაიდთან დაკავშირებით, ხელისუფლებას 10 დღიან ვადას ახსენებს:
“გუშინწინ გავიდა 10-დღიანი ვადა, რომელიც შევუთვალეთ ხელისუფლებას „პრაიდის კვირეულთან“ დაკავშირებით, რადგანაც მათ არ გააკეთეს განცხადება, რომ აუქმებენ ამ ღონისძიებას, ჩვენ ამას არ დავუშვებთ. 5 ივლისს ყველას გეძახით და გეპატიჟებით, მოგიწოდებთ, რომ მივიდეთ რუსთაველის გამზირზე, მე პირადად დილიდან ვიქნები რუსთაველის ძეგლთან” – ამბობს ვასაძე ვიდეომიმართვაში.
ის პარტნიორი ქვეყნების ელჩებსაც მიმართავს და “საელჩოებში დარჩენას” ურჩევს:
“მოვუწოდებ უცხოური ქვეყნების ელჩებს, განსაკუთრებით კი დასავლური ქვეყნების ელჩებს, რომლებმაც ტრადიციად გახადეს ქართული ტრადიციების დაცინვა და ხელყოფა, ნუ მიაყენებთ შეურაცხყოფას საქართველოს, მის ეკლესიას, დარჩით თქვენს საელჩოებში და ნუ გაერევით ამ პროვოკაციაში, სიბინძურეში“, – ამბობს ვასაძე.
რაც შეეხება ჯანმრთელობის მდგომარეობას, ვასაძე ამბობს, რომ ბოლო 2 თვის განმავლობაში გაუუარესდა მდგომარეობა, რის გამოც თბილისის და მოსკოვის კლინიკებს მიაკითხა, შემდეგ კი სტამბოლის.
“მიმდინარეობს კომპლექსური კვლევა, ჯერ საბოლოო პასუხი არ არის. მინდა ყველა დავამშვიდო, რომ ყველაფერი კარგად იქნება, ნებისმიერ ასეთ დაავადებას მოვერევით და ნუ ინერვიულებთ”, – ამბობს ვასაძე.
შეგახსენებთ, ვასაძემ ხელისუფლებას პრაიდის გასაუქმებლად 10 დღიანი ვადა მისცა.
