ევროპის ჩემპიონატის მონაწილე გუნდებს შესაძლოა, ჯარიმები დაუწესდეთ, თუკი მათი მოთამაშეები პრესკონფერენციის დროს სპონსორების სასმელს კამერებისგან მოშორებით დადგამენ.
ორშაბათს პორტუგალიელმა ფეხბურთელმა კრიშტიანუ რონალდუმ კოკა-კოლას ბოთლები გვერდზე გასწია და ყველას წყლის დალევისკენ მოუწოდა.
მომდევნო დღეს რონალდუს ფრანგმა ნახევარმცველმა, პოლ პოგბამ მიბაძა, თუმცა პოგბამ არა კოკა-კოლას არამედ “ჰეინეკენის” ლუდი “გადამალა.“
ფეხბურთელების ამგვარი ქმედების შემდეგ კი უეფამ მიიღო გადაწყვეტილება, რომ თუკი მსგავსი რამ კვლავ განმეორდება, გუნდებს დააჯარიმებს. “უეფამ მონაწილე გუნდებს შეახსენა, რომ პარტნიორობა ტურნირის განუყოფელი ნაწილია“, – აცხადებენ ევროპის ჩემპიონატის ორგანიზატორები.
“ევრო 2020”-ის ჩემპიონატის დირექტორი მარტინ კალენი ამბობს, რომ მოთამაშეებს ხელშეკრულებით ევალებათ ჩემპიონატის წესების დაცვა. თუმცა მისივე თქმით, ესმის ზოგიერთი ფეხბურთელის, მაგალითად უგებს პოგბას, რომელმაც ლუდზე უარი რელიგიური მიზეზების გამო თქვა.
აღსანიშნავია ასევე, უკრაინელი ფეხბურთელის, იარმოლენკოს ქმედება, რომელმაც გუშინ “კოკა-კოლასა” და “ჰეინეკენის” ბოთლები, პირიქით, გამოსაჩენ ადგილას დაალაგა და კომპანიებს მასთან თანამშრომლობისკენ მოუწოდა.
AMBEBI.GE
