რიონის ხეობის მცველები ხვალ, 23 მაისს, 14:00 საათზე, თბილისში, რესპუბლიკის მოედანზე საპროტესტო აქციას გამართავენ.
აქტივისტების მოთხოვნა უკვე 207 დღეა უცვლელია.
როგორც რიონის ხეობის მცველები თავიანთ ფეისბუკ გვერდზე წერენ, რომ 23 მაისს დაგეგმილი აქცია ერთჯერადი არ იქნება და დედაქალაქში დარჩენას იქამდე აპირებენ, ვიდრე მათი მოთხოვნები არ დაკმაყოფილდება.
23 მაისის აქციაზე ხეობის მცველები კვლავ მოითხოვენ:
შეწყდეს “ენკასთან” ნამახვანჰესის მშენებლობის შესახებ გაფორმებული ხელშეკრულება; კომპანიამ დატოვოს რიონის ხეობა; გაუქმდეს ის განკარგულება, რომლითაც “ენკას” კონკრეტული ქონება გადაეცა რიონის ხეობაში; გაუქმდეს ნამახვანჰესის მშენებლობის ნებართვა და გადადგეს ეკონომიკის მინისტრი ნათია თურნავა.
ცნობისთვის, აქტივისტებს ერთ თვეზე მეტია სოფელ ნამოხვანში არ უშვებენ. გუმათჰესთან პოლიციის მიერ 3 აპრილს აღმართული ბარიკადები ამ დრომდე არ მოუხსნიათ. ხელისუფლებასა და რიონის ხეობის მცველებს შორის მოლაპარაკების ორი მცდელობა ჩაიშალა.
რიონის ხეობაში 433 მგვტ. სიმძლავრის ჰესს კომპანია “ენკა” აშენებს. მთავრობასა და ინვესტორს შორის გაფორმებული ხელშეკრულება სპეციალისტებმა უკვე შეისწავლეს და მას ქვეყნის ინტერესების საზიანო უწოდეს.
