ამერიკის შეერთებული შტატების ქალაქ კოლამბუსში მდებარე ოჰაიოს სახელმწიფო უნივერსიტეტში მომუშავე მეცნიერთა განცხადებით, არამიწიერ ცივილიზაციას, შესაძლოა, 2026 წლისთვის მივაკვლიოთ, რაშიც ჯეიმს ვების კოსმოსური ტელესკოპი დაგვეხმარება. ამის შესახებ დეტალური ინფორმაცია მათ ამერიკის ფიზიკური საზოგადოების მიერ ახლახან გამართულ ონლაინ ღონისძიებაზე წარადგინეს.
ჯეიმს ვების კოსმოსური ტელესკოპის გაშვება მიმდინარე წლის ოქტომბერში იგეგმება, რის შემდეგაც ის ჩვენი მზის ირგვლივ ჰალო ორბიტაზე დაიწყებს მოძრაობას. მეცნიერები მასზე დიდ იმედს ამყარებენ, რადგან ხელსაწყო სიმძლავრით გამოირჩევა და შორეულ სივრცეში განლაგებული ობიექტების დეტალურად აღბეჭდვა შეუძლია. მათ შორისაა აირისგან შემდგარი ჯუჯა პლანეტები, კერძოდ კი მინი ნეპტუნები, რომელთაც მყარი ბირთვის გარშემო წყალბადითა და ჰელიუმით მდიდარი სქელი ატმოსფერო აქვთ. არ გამორიცხავენ იმასაც, რომ მსგავს ციურ სხეულებზე წყლისა და ამიაკის თხევადი ოკეანეები არსებობდეს.
იმის გასარკვევად, თუ რამდენ ხანში დააფიქსირებს ჯეიმს ვების კოსმოსური ტელესკოპი ეგზოპლანეტების ატმოსფეროში ისეთ ნივთიერებებს, რომლებიც იქ სიცოცხლის არსებობაზე მიანიშნებს, მეცნიერებმა კომპიუტერული მოდელირების მეთოდი გამოიყენეს. მათ განსაკუთრებული ყურადღება მკვეთრი სუნის მქონე უფერო აირზე, ამიაკზე გაამახვილეს. კვლევამ აჩვენა, რომ ხელსაწყოს აღნიშნული ნივთიერების მოლეკულების აღმოსაჩენად სულ რაღაც 60 საათი დასჭირდება, მზის გარშემო ორბიტაზე დაახლოებით 10 წრის შესრულებისას კი კონკრეტული დასკვნების გამოსატანად საკმარისი რაოდენობის მონაცემებს მოიპოვებს. შედეგად, არამიწიერ ცივილიზაციას, მისი არსებობის შემთხვევაში, 5-10 წელიწადში მივაგნებთ.
მკვლევრებმა იმ ციური სხეულების სიაც შეადგინეს, რომლებიც ჯეიმს ვების კოსმოსურმა ტელესკოპმა პირველ რიგში უნდა შეისწავლოს. მათი განცხადებით, თანამედროვე ტექნოლოგია და მეცნიერული ცოდნა გვაძლევს იმის შესაძლებლობას, რომ არამიწიერ ცივილიზაციებთან დაკავშირებით არსებულ კითხვებს გავცეთ პასუხი.
