ადგილობრივების გრძნობებზე თამაშობენ – ლევან დავითაშვილი “ნამახვანჰესზე”

გარემოს დაცვის და სოფლის მეურნეობის მინისტრ ლევან დავითაშვილის განცხადებით, პრემიერისგან მიღებული დავალების საფუძველზე, ეკონომიკის მინისტრ ნათია თურნავასთან ერთად ჩავა და ადგილზე გაეცნობა ნამახვანის ჰესის მშენებლობის მოწინააღმდეგე მოსახლეობის პროტესტის მიზეზებს.

მინისტრი თვლის, რომ მათ ხელთ არსებული საექსპერტო დასკვნების საფუძველზე მოახერხებენ მოსახლეობის დარწმუნებას და პროექტი წარმატებით განხორციელდება.

ლევან დავითაშვილის თქმით, შეხვედრები დაგეგმილია ცაგერის მუნიციპალიტეტსა და ქუთაისში. ქვედა ნამახვანი იმერეთშია განთავსებული და მოიცავს წყალტუბოს რაიონის სოფლებს. მინისტრის თანახმად, მშენებლობასთან დაკავშირებით გარემოსდაცვითი გადაწყვეტილება მხოლოდ ქვედა ნამახვანზეა გაცემული.

ლევან დავითაშვილის თქმით, ჰესის მშენებლობასთან დაკავშირებული გადაწყვეტილება ბევრ საექსპერტო ჯგუფთან კომუნიკაციითაა მიღებული, თუმცა, როგორც ჩანს, მოსახლეობის ფართო ფენებისთვის მიწოდებული ინფორმაცია საკმარისი არ აღმოჩნდა და აუცილებელი გახდა დამატებითი კომუნიკაცია. ლევან დავითაშვილი ამობოს, რომ გარემოსდაცვითი შეფასების პროცესში მიღებული დასკვნები იქნება ის არგუმენტი, რომლითაც ადგილობრივ მოსახლოებას დაელპარაკებიან.

„ალპებში მსგავსი რელიეფი, მსგავსი გარემო პირობებია და იქ არის ყველაზე მეტად განვითარებული ჰიდროელექტროენერგიის გენერაცია, მათ შორის ასეთი ტიპის კაშხლები, რომელიც აქ არის მოცემული და იქ დაშვებულია და შესწავლილია, რომ ფაქტობრივად თეორიული შანსიც არ არსებობს იმისი, რომ მიწისძვრის შედეგად მოხდეს ასეთი დამბის გარღვევა, რომელიც არ ყოფილა ისტორიაში ასეთი კონსტრუქციის ნაგებობებთან მიმართებით. ფაქტობრივად გამოირიცხება და ამას ამბობენ, ყველაზე მაღალი რეპუტაციის ექსპერტები, მაშინ როცა ჩვენ გვესმის საწინააღმდეგო, არაფერზე დაფუძნებით“, – განაცხადა ლევან დავითაშვილმა მთავრობის სხდომის დასრულების შემდეგ გამართულ ბრიფინგზე.

ასევე დაგაინტერტესებთ:

„ნამახვანჰესი“ ჩვენი იმპორტის დიდი ნაწილის ჩანაცვლებას უზრუნველყოფს – ნათია თურნავა

რას აცხადებენ ნამახვანჰესის მოწინააღმდეგეები მთავრობის წევრებთან შეხვედრაზე

მისი სიტყვებით, გულსატკენია, რომ ისეთი ტიპის საკითხებზე საუბრისას როგორიცაა კლიმატზე ზემოქმედება, გეოლოგიური საფრთხეები, როგორია ქანები და ა.შ. აპელირებენ, თითქოს არ ყოფილა საჯარო განხილვები. მინისტრის განცხადებით, გარემოზე ზემოქმედების ანგარიში ქვეყნდებოდა საიტზე და ოპონენტებმა ეს იციან. ლევან დავითაშვილს უჩნდება ეჭვი, რომ „ამ ადამიანებს გარკვეული დღის წესრიგი გააჩნიათ, ადგილობრივი მოსახლეობის გრძნობებზე თამაშობენ და ცდილობენ მათი გრძნობები გამოიყენონ“, რაც მისი შეფასებით, უპასუხისმგებლობაა.

„ჩვენ, რა თქმა უნდა, უნდა შევქმნათ სწორი, ობიექტური აზრი და პატივი უნდა ვცეთ მოსახლეობის აზრს. რამდენადაც დიდი იქნება გამოწვევა იმდენად დიდი იქნება ჩვენი პასუხი. ეს არის ბევრი ჯგუფი, ეს არის ადგილობრივები, სხვადასხვა ენთუზიასტები, ვითომ ექსპერტული ჯგუფების წარმომადგენლები, ასეთივე არასამთავრობო ორგანიზაციები და ა.შ.“, – ამბობს ლევან დავითაშვილი.

საქართველოს პრემიერ-მინისტრმა, ირაკლი ღარიბაშვილმა სოფლის მეურნეობისა და გარემოს დაცვის მინისტრ ლევან დავითაშვილსა და ეკონომიკის მინისტრ ნათია თურნავას “ნამახვანჰესზე” სასაუბროდ რეგიონში ჩასვლა და მოსახლეობასთან შეხვედრა დაავალა. მინისტრებმა დავალება მთავრობის სხდომის დაწყებამდე მიიღეს.

თუ ნამახვანის ჰიდროელექტროსადგური აშენდა, ის საქართველოში საბჭოთა კავშირის დაშლის შემდეგ განხორციელებული ყველაზე დიდი ენერგეტიკული პროექტი იქნება. ჰესის საერთო სიმძლავრე 433 მეგავატი იქნება.

კასკადი ხეობაში ორი კაშხლის აგებას ითვალისწინებს. ერთის სიმაღლე, სოფელ ტვიშთან, 60 მეტრი იქნება, მეორის, წყალტუბოს მუნიციპალიტეტში, 111 მეტრი.

შენდება მდინარე რიონის ხეობაში, წყალტუბოსა და ცაგერის მუნიციპალიტეტებში.

ადგილობრივი მოსახლეობა ნამახვანჰესის მშენებლობას უკვე ოთხი თვეა აპროტესტებს და მოითხოვს, კომპანია “ენკა რინიუებლზმა” დატოვოს რიონის ხეობა.