ბიძინა ივანიშვილის ნათესევმა იმერეთში 15 მილიონ ლარზე მეტი ტენდერი მოიგო – ამის შესახებ მფლანგველი დეტექტორი წერს:
“
ინდმეწარმე მურმან ტოგონიძემ 100-დან 72 ტენდერში გაიმარჯვა, 28-ში უკონკურენტოდ, ხოლო 17-ში კონკურენტთა დისკვალიფიკაციის ხარჯზე. 72 მოგებული ტენდერიდან 70 საჩხერის და ჭიათურის მუნიციპალიტეტებზე მოდის, კერძოდ 56 ტენდერი საჩხერეში მოიგო, 14 კი ჭიათურაში.
საჩხერეში, რომლის 2020 წლის ბიუჯეტი 17 მილიონი ლარი იყო, ბიძინა ივანიშვილის ნათესავის მიერ მოგებული ტენდერების ჯამური თანხა 12.5 მილიონ ლარს შეადგენს.” – აღნიშნულია ინფორმაციაში.
უფრო დეტალურად:
“მურმანი ტოგონიძე საჩხერელი ინდივიდუალური მეწარმე და რამდენიმე კომპანიის მფლობელია. ტოგონიძე ბიძინა ივანიშვილის დის, მაგული ივანიშვილის მულის ქმარია. მის მფლობელობაში ორი კომპანიაა, შპს „მშენინვესტი“ (ს/კ 439395600 ) და შპს „აგროსაჩხერე“ (439395450).
ტოგონიძე აქტიურად მონაწილეობს ტენდერებში და უმეტესწილად იმარჯვებს კიდეც. იგი ინდივიდუალურ მეწარმედ 2006 წლის 2 ნოემბერს დარეგისტრირდა, თუმცა ელექტრონულ შესყიდვებში 2014 წლის სექტემბრამდე არ მიუღია მონაწილეობა. 2014 წლიდან დღემდე იგი 100 ტენდერის მონაწილეა, აქედან 72 შემთხვევაში გაიმარჯვა. იგი ძირითადად საჩხერისა და ჭიათურის მერიის მიერ გამოცხადებულ შესყიდვებში მონაწილეობს. ჯამში ტოგონიძემ 15,609,160 ლარის ტენდერები მოიგო. აქედან უკონკურენტოდ 28 ტენდერი და 5,526,853 ლარის ხელშეკრულება გაუფორმეს, დისკვალიფიკაციით 3,926,091 ლარის ღირებულების 17 ტენდერი, ფასის კლებითა და დაბალი ფასებით 27 ტენდერი, რომელთა სახელშეკრულებო თანხა 6,156,215 ლარს შეადგენს.
ტოგონიძეს, როგორც ინდᲛეწარმეს 72 ტენდერიდან 56 საჩხერეში აქვს მოგებული. მათი სახელშეკრულებო თანხა – 12,486,816 ლარს შეადგენს. ჭიათურაში კი 14 ელექტრონულ შესყიდვაში 1,695,215 ლარის ხელშეკრულება გაუფორმეს. ბაღდათის მუნიციპალიტეტმა 1,276,188 ხელშეკრულება ერთ ტენდერში გაუფორმა, რომელიც (NAT200006639) ინდ.მეწარმემ დისკვალიფიკაციის ხარჯზე მოიგო. ერთმანეთს 7 კომპანია/ინდ. მეწარმე დაუპირისპირდა. ტოგონიძეზე დაბალი თანხა მხოლოდ ერთ, შპს-ს „გი-ან 2011“ ჰქონდა შეთავაზებული და ტექნიკური დოკუმენტაციის გამო მას დისკვალიფიკაცია მისცეს. ამის შემდეგ ყველაზე დაბალი თანხით შესული ტოგონიძე გახდა და ხელშეკრულებაც სწორედ მას გაუფორმეს.
ლაგოდეხის მუნიციპალიტეტში 1 ტენდერი აქვს მოგებული (NAT190005887). მას და შპს „ჯი ბი ჯი“ ერთნაირი თანხა ჰქონდათ შეთავაზებული, მაგრამ ხელშეკრულება მაინც ტოგონიძეს გაუფორმდა.
პანდემიის პირობებში ტოგონიძემ სახელმწიფოსთან 10 ხელშეკრულება გააფორმა, რომელთა ჯამური საფასური 3,426,414 ლარია. 10 ტენდერიდან 5 კონკურენტის გარეშე მოიგო, 3 კონკურენტთა დისკვალიფიკაციით, ხოლო 2 ტენდერი დაბალი ფასით. სწორედ პანდემიის პირობებში, დისკვალიფიკაციის ხარჯზე მოიგო ტოგონიძემ ზემო ხსენებული ტენდერი, რომელიც ბაღდათის მუნიციპალიტეტმა გამოაცხადა (1,276,188 ლარი). 8 ტენდერი საჩხერის მუნიციპალიტეტში გაფორმდა 1,962,774 ლარზე. ერთი ელექტრონული შესყიდვა კი, ჭიათურის მუნიციპალიტეტის მერიამ გააფორმა 149,153 ლარზე.” – წერს მფლანგველი დეტექტორი.
