საქართველოში აშშ-ის ელჩის, კელი დეგნანის რეზიდენციაში ხელისუფლების წარმომადგენლებსა და ოპოზიციას შორის საარჩევნო საკითხთან დაკავშირებით მოლაპარაკების მესამე რაუნდი დასრულდა.
„ევროპული საქართველოს“ ლიდერის დავით ბაქრაძის განცხადებით, ოპოზიციასა და ხელისუფლებას შორის გამართული მოლაპარაკების მესამე რაუნდზე გარკვეულ საკითხებზე პოზიციები დაახლოვდა, თუმცა დარჩა რამდენიმე საკითხები, სადაც ეს ვერ მოხერხდა.
„დღეს დეტალებზე ვერ ვისაუბრებთ ელჩების თხოვნით. შემიძლია გითხართ, რომ იყო გარკვეული საკითხები, რომელზეც პოზიციების დაახლოება მოხერხდა, თუმცა დარჩენილია რამდენიმე მთავარი საკითხი, სადაც პოზიციები ვერ დაახლოვდა. ამიტომ გაგრძელდება პროცესი. ხვალ იქნება მომდევნო შეხვედრა და იმედი მაქვს, ხვალინდელი შეხვედრის შემდეგ უკვე ნამდვილად შეგვეძლება, დეტალები გავაცნოთ საზოგადეობას“,- განაცხადა ბაქრაძემ.
თითქოს, რაღაც უკეთესობის ნიშნები გამოიკვეთა საარჩევნო რეფორმის ხაზით, მაგრამ ჩვენ საარჩევნო რეფორმა კი არა, ახალი პარლამენტის არჩევნები გვინდა და შესაბამისად, ამ მიზანს ყველაფერი უნდა უკავშირდებოდეს. ჩემი ამოცანა და მიზანია არავითარი ცენტრალური საარჩევნო კომისია არ არსებობდეს. ყველა დემოკრატიულ ქვეყანაში ცესკო კომპლექტდება არჩევნების წინ და შემდეგ იშლება, ამ დონემდე უნდა მივიდეთ. ჯერჯერობით, არ არის საუბარი, კომპრომისზე, დათმობასა ან რეგრესზე, საუაბარი არის იმაზე, რომ გველოდება მეოთხე რაუნდი”, – განაცხადა შალვა ნათელაშვილმა.
„პუნქტებად გავიარეთ „ქართული ოცნების“ წინადადებაც და ოპოზიციის წინადადებაც. იყო რაღაც საკითხები, რაზეც შევთანხმდით, მაგრამ დარჩა ბევრი საკითხი, რომელიც ჯერ კიდევ შეუთანხმებელია. არ მაქვს იმის უფლება, რომ დეტალები გითხრათ, მაგრამ ახლა, იმის თქმა შემიძლია, რომ პუნქტობრივად გავიარეთ, არის რაღაც პუნქტები, რაზეც თანხმობის მიღწევა შესაძლებელია, მაგრამ არის პრინციპული საკითხები, რაზეც ჯერჯერობით შეთანხმება შეუძლებელია,“- განაცხადა ზურა ჯაფარიძემ.
“სასარგებლო შეხვედრა იყო. ეს ნიშნავს, რომ რაღაც საკითხებზე პოზიციები დავაახლოვეთ. განსხვავებები რჩება. ჩვენ არ გაქვს შეთანხმება იმასთან დაკავშირებით, რა საუბარიც გვქონდა შიგნით, მოლაპარაკების დროს, ეს საუბარი დეტალურად გამოვიტანოთ. ამიტომ, თქვენს კონკრეტულ კითხვებზე პასუხს ვერ გავცემ“,-განუცხადა ბადრი ჯაფარიძემ.
„არსებული რეალობიდან გამომდინარე, ძალიან ბევრ საკითხზე ვისაუბრეთ. ნაადრევია იმის თქმა, რომ მთავარ საკითხზე შეთანხმება მიღწეულია – შეთანხმება მიღწეული არ არის. შეხვედრები, მოლაპარაკებების მესამე რაუნდი დღეს არ დასრულებულა და კიდევ გრძელდება. იმედს ვიტოვებთ, რომ ხელისუფლებას გონიერება ეყოფა და პრობლემებს მეტად გაანალიზებს“, – განუცხადა გოჩა თევდორაძემ.
“ელჩებმა თქვეს, რომ დღეს საღამოს დაგვიკავშირდებიან. მოლაპარაკებების რესურსი ყოველთვის არსებობს იმიტომ, რომ მოლაპარაკებები თუ არ შედგა ჩვენი სახელმწიფო აღმოჩნდება ძალიან მძიმე დღეში. Ჩემთვის პოლიტპატიმრების გათავისუფლება ერთ-ერთი ყველაზე მნიშვნელოვანი საკითხია, მაგრამ სამწუხაროდ, ჯერ მთავარ საკითხებზე კომპრომისი ჰორიზონტზე არ ჩანს. “ქართული ოცნების” მხრიდან ჩანს მზაობა მნიშვნელოვან საკითხებზე, მაგრამ არ ჩანს მზაობა მთავარ საკითხებზე, რომელზეც ოპოზიცია 1 ნოემბრიდან საუბრობს”,- განაცხადა გრიგოლ ვაშაძემ.
„დღევანდელი შეხვედრა ნამდვილად საქმიანი და პოზიტიური იყო. ჩვენ გავიარეთ აბსოლუტურად ყველა საკითხი და არის საკითხები, სადაც პოზიციების დაახლოება ხდება, თუმცა ძირითად საკითხებთან დაკავშირებით ჩვენსა და ხელისუფლებას შორის პოზიციების სხვადასხვაობაა. ახლა დღევანდელი დისკუსიის შემდეგ შიდა განხილვები გვექნება. რა თქმა უნდა, აქ საუბარია რიგგარეშე არჩევნებზე და სხვა თემებზე. არის საკითხები სადაც ყველა თანხმდება, რომ ქვეყანაში ფუნდამენტურად შესაცვლელია საარჩევნო გარემო. არის საკითხები რაზეც ვერ ვთანხმდებით – რიგგარეშე არჩევნების საკითხი, პოლიტპატიმრების საკითხი”, – განაცხადა გიორგი ვაშაძემ.
