ხალხის ნაწილს ჩემი ავადმყოფობის არ სჯერა ნაწილს ხომ საერთოდ კორონას არსებობისა არ სჯერა და ჰგონია, რომ აქ წოლაში ფული გადამიხადეს – ამის შესახებ კოვიდინფიცირებული ჟურნალისტი ზურა ბალანჩივაძე საავადმყოფოდან წერს.
“იმერედის დილის” ჟურნალისტის ვირუსი რამდენიმე დღის წინ დაუდასტურდა:
“დილით ასეთი მზე დამხვდა. ცივი, მაგრამ თბილი ფერებით ანთებული მზე. ახლა ჩვეულებრივი ზამთარია. მადლობა მზეს, რომ ფოტოს გადაღება მაცადა.
ღამე ზურგის ტკივილმა გამაგიჟა… წოლამაც იცის, კორონამაც და საწოლმაც. სამივეს ვაბრალებ. ანუ კუნთების და სახსრების ტკივლი ახასიათებს. მირჩიეს, გვედულად ან გულზე დამეძინა, თუმცა, კათეტერიანი ხელით, ასე იოლად ვერ ვბრუნდები. ძალიან ჩავიფუთნე, რაღაცები შემოვიხვიე, რომ პოზა შემენარჩუნებინა და არ გავციებულიყავი და ამან ოფლად დამღვარა. დილით მაისური ლამის გასაწური გახდა. თან ეს მაისურიც ხომ გაცივდა ამ სითხისგან და მერე დამეწყო კანკალი ცივთან კონტაქტის გამო… მოკლედ, მოვხვიე საბანს ხელი და გადავწექი დივანზე. ეგრევე გავითიშე…
ბევრი მეკითხება სიმპტომებზე და ბარემ აქვე გეტყვით: კორონავირუსისთვის დამახასიათებელი გამოვლინებები – გემო-ყნოსვის დაკარგვა, ყელის ტკივლი, ჩახეხვა, ხველა, სიცხე, ცხვირში გაჭედვა, სუნთქვის გაძნელება, მკერდში ტკივლი და ა.შ. – ყველა შემთხვევაში სხვადასხვანაირად და განსხვავებული კომბინაციით ვლინდება, ან საერთოდ არ ვლინდება. ასე რომ მე თუ სიცხით დამეწყო, ეს არ ნიშნავს, რომ სხვასაც ასე ექნება.
შემოყვანიდან ოთხ დღეში ერთხელ კეთდება პი-სი-არ ტესტი, ანუ ხვალ მიწევს და ვნახოთ ერთი, რას მეტყვის.
ჩემი მოსვლიდან კიდევ 12 შემოიყვანეს აქ. შემთხვევების რაოდენობა იმატებს და იმატებს. ჩაკეტვა კი ისევ არ იწყება. ბრიტანეთმა და საფრანგეთმა უკვე ისევ გაამკაცრეს…
რომ ვუყურებ, როგორ წურწურით ჩამოსდით ოფლი თავიდან ბოლომდე შეფუთულ ექიმებს, ექთნებს, სანიტრებს და მაინც როგორ ინარჩუნებენ მხნეობას, ვხვდები, რომ ჩვენს შორის განსხვავება მხოლოდ ისაა, რომ მე გადამდები ვარ და ისინი – არა. რას უძლებენ, ვერ წარმოიდგენთ. ისედაც ხომ რამდენი საქმეა და კიდევ ამ ყველაფრის უჰაერობაში კეთება, ხომ საერთოდ.
იცით, რა მწყინს? რამდენჯერმე რომ ჩამრთეს პირდაპირ ეთერში, ხალხის ნაწილმა დააკომენტარა, რომ ჩემი ავადმყოფობის არ სჯერა და რომ ეს ფარსია ყველაფერი. ცალკე მეორე ნაწილს ხომ საერთოდ კორონას არსებობისა არ სჯერა და ჰგონია, რომ აქ წოლაში ფული გადამიხადეს. ძალიან მეფიქრება, რა შთამომავლობას გაზრდიან ასეთი ადამიანები, რას ასწავლიან, რაზე ეტყვიან, რომ კარგია ან ცუდი. მოკლედ, ეგეთებს და ფანატიკოსებს ისე მოერიდეთ, როგორც მე ახლა – ოღონდ რეალურ კონტაქტში. 
ჯანმრთელობა ყველას.” – წერს ზურა ბალანჩივაძე ფეისბუკზე
